National Emergency Black Day hmang

BJP, Mizoram Pra­desh chuan nimin khan Ai­zawla an pisaah National Emergency Black Day an hmang.

Mizoram BJP thu­chhuah chuan, National Emergency Black Day chu kum 1975-a India rama emergency puan hriat reng nan a champhaah India ram hmun hrang hrangah hman ṭhin a nih thu an tarlang a, "National emergency puan hi India history-ah hun thim lai bera sawi a ni. He thil vang hian India hmangaihtute an rûm a, Congress thil tih tawhah chuan ngaihdam theih ngai tawh loh tur a ni," an ti.

National emergency puan avangin sorkar hnathawk leh media mite dikna chanvo rahbehsak a nih thu tarlangin BJP chuan, "India Danpui tihbawrhbàn a ni a, MISA dan hmangin chhan awm loin mi tam tak an man a, dan bawhchhiat leh palzûtnain ram pum a tuam a ni," an ti a; Mizoramah pawh national emergency laiin lung-ina táng eng emaw zat an awm a, chu'ng zingah chuan Brig T Sailo, R Vanlawma, C Vulluaia leh Sanglianchhungi te an tel tih an sawi.

MISA vanga jail-a táng Mizote chu an ngaihlu hle tih sawiin Mizoram BJP chuan, "MISA vanga jail táng la damte hi an awmna state-te'n zângnadawmna an pe a, Mizoramah erawh pek an ni lo," an ti a; Mizoram sorkar chu a rang thei ang bera ngaihtuahsak turin an phût a ni.