KHAWTHLIR

Mizoram sorkar hnuaia zirtirtu pawl hrang hrang intèl khawmna, Mizoram Teachers Federation (MTF) chuan Covid-19 hripui léng dona atana sum an thawh khawm aṭangin Kolasib District Border Safety Monitoring Team hnenah nimin khan Rs. 2,00,000 an pe. Ṭanpuina hi MTF hian Kolasib DC kutah an hlân a ni.

Journalist, Francis Paul (42) s/o Paul TK Donga, Zuangtui chu nimin zing dar 5 vel khan lungphuchâwl (heart attack) vangin a thi a, a nupui leh a fate pali a kalsan. February 19, 1978-a piang Francis Paul hi Doordarshan Kendra, Aizawlah infiamna thuthar buaipuitu a ni a, kum 2010-ah Mizoram Journalists’ Association member atan lak luh a ni. MJA Gen.hqrs. leh district-a MJA-te chuan thuchhuah siamin, an ui thu an tarlang hlawm a ni.

Zirlai páwl hrang hrang - MZP, MSU leh NSUI leh, MNF party ṭhalaite chuan a hranpa ṭheuha thuchhuah siam­in, MBSE-in HSSLC Examinations 2020 result nimina a tichhuak chu lawmawm an tih thu an tarlang. Pawl hrang hrangte chuan, pawl 12 pass thar zirlaite chu an lawmpui thu leh an zir zelna turah duhsakna an hlan thu an sawi a; pass ve lote chu  beidawng loa zir zel tura an duh thu sawiin, an hlawhtlin theih nan duhsakna an hlan a ni.

Civil Hospital Lung­lei laboratory-ah July 13, Thawhṭanni khan TrueNAT hmangin mi 31-te swab sample endik a ni a, Covid-19 vei hmuh chhuah an awm lo. Swab sample endikte chu hripui veite vanga rinhlelh, Lunglei district mi vek an nih thu sorkar thuchhuahin a tarlang.

Kolasib District Magistrate chuan, Covid-19 veite enkawlna hmun a nih avanga containment area-a puan tawh hmun ṭhenkhat - Kolasib College, Thingdawla Tou­rist Lodge (Highway Restaurant) leh Bairabia PWD inspection bunga­low leh a chhehvelte chu containment area an nihna hlih a nih thu a puang.