Covid-19 vei dam tawh thlah

Khawzawl district-a Covid-19 hripui vei mi pathum zinga pakhat chu a dam tawh avangin nimin khan Khawzawl damdawi-ina Dedicated Covid Health Centre (DCHC) aṭangin chhuahtir a ni a, district thuneitute'n thlahin, duhsakna an hlan.

Thlahna hun tawi an hmanah Khawzawl additional DC Paul L Khuma chuan, hripui vei dam leh ta chu a lawmpui thu sawiin, Covid-19 chu thuawihna leh huaisennaa hneh theih a nihzia a tihchian thu a sawi a; hripui veite enkawltu doctor, nurse leh thawktu dangte inpekna chu chhuanawm a tih thu sawiin, tuna Covid-19 la vei mekte pawh dam thuai turin duhsakna a hlàn a ni.

Inkhawmah hian medical officer Dr Lalngaihawmi Chhangte-in hripui veite an enkawl dan a sawi a, Khawzawl SP PC Lalchunglura'n certificate a hlàn thung.

Tun dinhmunah Khawzawl district-ah hian quarantine facility leh isolation facili­ty hrang hrangah mi 59 an awm mek a ni.