CM-in ADB aṭanga loan pûk tum a fak ; Theih se a aia tam pûk a châkawm - CM

Mizoram Cooperative Apex Bank (MCAB) chuan nimin khan Vanapa Hall-ah General Assembly vawi 27-na an hmang a; khuallian chief minister Zoramthanga chuan, Asian Development Bank (ADB) aṭanga loan pûk tum mek chu fakin, "Theih se a aia tam pûk a chakawm," a ti.

MCAB inkhawmpui hi chairman T Lalmuanpuii'n a kaihruai a; Chief Minister chuan, health care scheme atan a pung tam thei ang bera peipun tur loan an buaipui mek thu sawiin, "ADB aṭangin cheng vbc. 1,000 pûk tum a ni. Ṭhenkhatin politics-a inbeihna atan pûk ngawt mai, ba ngawt mai, engtin nge an tih dawn. Bang chhak sah thlaka bang thlang bel tum ang lek a nite an ti," a ti a; sawiseltute chuan an hriatthiam loh vang a nih thu a sawi.

Zoramthanga chuan, ADB aṭanga loan pûk theih a nih chuan cheng vbc. 1,000 aṭangin state sorkar rulh tur chu vbc. 280 a nih thu a sawi a, "India sorkarin vbc. 720 min rulhsak dawn. A aia tam pûk zel a châkawm, theih se chuan. State-in a rulh ve turah min pawmsak tur chhawp tur a la awm cheu," a ti.

Chief Minister chuan, 'Pûk vak vak' tia sawisel an awm thu sawiin, "Kan pûk a, a thlâwna kan hmuh tur chu cheng vbc. 720 a ni. Vbc. 720 lai min rulhsak dawn chuan pûk leh zel a châkawm," a ti a; sorkar laipuiin state a rulhsakna aṭangin state-in rûl vein, sorkar laipui hlir rulhtir tura tihlet dan thiam viau dan a awm niin a sawi.

ADB aṭanga loan pûk a nih chuan ngaihtuahnaa awm tur chu khawi bank, financial institution-ah nge dah a nih ang tih a nih thu sawiin Zoramthanga chuan, "A pung awm tura a rang thei anga dah nghal kan tum dawn," a ti.

CM Zoramthanga chuan, banking system-ah fimkhur a ngaih thu sawiin, "Chiahpuam ang maia lo function a awm thei," a ti a, Mizoram sorkar chu banking system-ah a fimkhur thu a sawi.

Khualzahawm C Lalrinsanga, Cooperation minister pawhin thu sawiin, cooperation movement hlawhtlinna tur chuan rinawmna leh taimakna a pawimawh thu a sawi a, "Inpekna tak tak nen kalpui a ngai. Mahniin hlâwkna chang lo pawh ni ila, mi dang chuan chang rawh se tih rilru put te, ṭan rualna leh nasa taka ram tan inpekna rilru put a pawimawh," a ti.

MCAB hi kum 1982-a din a ni a, Board of Directors-in enkawlin, BoD-ah member 10 an awm. Bank branch 22, Mizo ṭawnga hman theihna ATM 22 leh mobile ATM van pahnih an nei mek a ni.