Tuialhthei a la harsa rih deuh dawn

Tun hnaia ruahsur nasa avanga Meghalaya-a leimin, Assam-a tuilian leh rél kawng chhia avangin Mizoramah tuialhthei phurh luhna kawngah harsatna a la awm zel a, hei vang hian tuialhthei a la harsa rih dawn tih All Mizoram Petroleum Dealers Asso­ciation (AMPEDA) presi­dent K Lalnghakliana chuan a sawi.

Vanglaini palai zawh­na chhângin K Lalnghak­liana chuan, "Cachar district-a tuilianin kawng a tihchhiat chu awl­sam taka siam theih a nih pawhin, Silchar leh Guwahati inkar rél kawng chhia siamṭhat a la nih loh avangin duh thálin oil kan la hnianghnâr thei dawn lo. Rél kawng chhia chu tun aṭanga ni thum velah siamṭhat theih a nih a, rélin Silchar-a oil a phurh luh theih hunah Mizoramah pawh oil-a harsatna a ziaawm a rinawm," a ti.

Tuialhthei chhêk khawlna, oil depot chung-changah K Lalnghakliana chuan, Vairengtea oil depot chu mini oil depot a ni a, tam tham dah khawl theih a ni lo tih sawiin, "He depot hi kum 30 kal ta vela mi kha a ni," a ti a; Indian Oil Corporation-in Sairangah oil depot siam turin hma a la mek a, peih a nih hunah chuan Mizoramin tuialhthei a hnianghnâr theih a rin thu a sawi bawk.