Mizoram sorkarin a sum dawn budget document-a a awmna turah a dah lo - ZLP
ZPM Legislature Party (ZLP) chuan nimin khan Aizawl Press Club-ah thuthar thehdarhtute an kâwm a, Mizoram sorkarin sum a dawnte budget document-a a awmna turah a dah lo tih an sawi.
ZLP secretary Dr Vanlalthlana chuan, kum 2022-23 Mizoram State Annual Budget bu hrang hrang zingah Annual Financial Statement leh Receipts Budget chu en mai chuan ṭha deuh anga a lan thu sawiin, "Chîk zawka enin, thil dik tâwk lo a awma kan hriat avangin February-March, 2022 chhunga Assembly session-ah 15th Finance Commission grant hnuaia cheng vbc. 93 kan hmuh zawh loh thu au chhuahpui a ni tawh," a ti.
15th FC grant chungchang hi Finance changtu Chief Minister-in chháng loin, LAD minister K Lalrinliana'n a chháng tih sawiin ZLP Secretary chuan, "Budget bu ngeiah hmuh theiha a awm thu a rawn tarlang," a ti a; a hrana tarlanna a awm lo tih chiang mah se, a staff-te aṭanga thu a dawn anga sawi chhuah mai a nih an rin avangin an ngawih zui thu a sawi.
Dr Vanlalthlana chuan, Ministry of Finance-in RTI Act hmanga zawhna an chhanna aṭangin sum tam tham tak, budget document-a tarlan loh an hmuh chhuah thu sawiin, "Sum lo dawng pawh ni teh se la, a account dahna a danglam hian hman theih dante a danglam theih avangin kan ngaih a ṭha lo," a ti.
ZLP Secretary chuan, "Cheng nuai 29,300 (9,300 + 20,000 ) lai mai telh loh emaw, account danga awm thei tur hi a hman lohna turah ‘an lo kangin an lo bai’ mai ang tih kan hlauh avangin mipui hriatah kan puangzar a ni," a ti a; budget document-a dik lo tarlan tumna leh budget buaipuitute tihhminghliau tumna ai mahin, state sorkarin sum a dawnna account tihdanglam a ni chu an ngaih tiṭha lotu a nih thu a sawi.
Chief Minister chu a minister leh MLA-te'n sum enkawl thiam avanga an fak rawn a nih thu sawiin, chîk leh zuala budget enpui turin ZLP chuan CM an ngen a ni.