July 2022-ah SEDP sum sem beisei

MNF senior vice president Tawnluia chuan, SEDP hnuaiah July thla aṭangin pawisa sem theih tawh tura a ngaih thu a sawi.

Tawnluia hian nimin khan Khawhaia Tuichang South Block MNF conference-ah thu sawiin, SEDP chu policy a nih thu a sawi a, "Policy hnuaiah péng hrang hrang awmin, chu chu programme a ni. Covid hripuiin min tihbuai avangin kum hnih chhung SEDP kan kalpui thei lo a, amaherawhchu kan sorkar tirh aṭang khan SEDP a kal reng. July 2022 chhungin DC tin aṭangin pawisa an sem chhuak thei tawh turah ka ngai," a ti.

MNF Sr. Vice President chuan, MNF chu hnam party a nia sawiin, "Mizo hnam hma hruaitu a ni a, kum 1961-ah Pu Denga'n kan hnam leh Kristianna venghim tura a din a ni," a ti a; thil dang zawng zawng aiin Pathian hming an lam hmasa ṭhin niin a sawi. "Kan ram leh hnam tana nun hlântute kha vawiina kan fate tana martar an ni a, hnam tana martarte hi kan hlamchhiah thei lo. MNF hi martarte thisena bual tawh a ni," a ti bawk.