Silchar YMA tui semin an hnatlang Sorkar leh CYMA-in tui an thawn belh

Silchar YMA-in Mizoram aṭanga tui an dawnte chu Thawhṭanni aṭang khan hnatlangin an sem a, niminah pawh committee member-te'n hnatlangin an sem leh a ni. Nimin vêk khan Mizoram sorkar leh Central YMA-in tui thianghlim tam tham tak Assam lamah an thawn thla.

Silchar YMA president K Vanlalhriata chuan Vanglaini zawhna chhángin, Silchar-ah tui a len tirh aṭangin YMA-te'n a theih ang angin chhawmdawl hna an thawk tih a sawi a, "A tirah chuan Mizo zinga harsatna tawk, YMA-a inhriattirte a remchan angin ṭanpuina kan pe a, nimin piah aṭang khan hnam dangte hnenah kan pe ṭan. Vawiin (Thawhlehni)-ah chuan YMA Committee member-te bik tui semin kan hnatlang," a ti.

K Vanlalhriata chuan, Mizoram aṭanga Silchar mipui puihna atana tui thawn thlâk zinga báwm 400 vel Silchar YMA-in an dawn thu sawiin, "Naktuk (Nilaini) hian tui sem hnatlangpui kan nei dawn a, hetah hian Mizote chauh ni loin, Mission Compound-a awm hnam dangte pawh an tel ang," a ti a; tun dinhmunah chuan Silchar-a Mizo awmte dinhmun a ziaawm tawh tih a sawi.

Silchar YMA President chuan, tuilian a ziaawm viau tawh tih sawiin, "Khawpui chhungah chuan tui a kam viau tawh a, hmun ṭhenkhatah erawh chuan áwm leh dul vel thlenga tui dai ngaite a la awm," a ti. Thu dawn danin, Silchar khawpuiah tui a kàm tawh avangin hmun tam takah chuan dàwr an hawng tawh a ni.

Hetih lai hian, Mizoram sorkar ruahman angin tui phur truck (tanker) panga chuan nimin khan Vairengte aṭangin Assam lamah tui thianghlim litre 24,000 an phur thla leh a, Lailapur Police Station aṭangin Assam police-te'n Sonai Circle Office thleng an zui a, Sonai Circle Office-in ṭul an tihna hmunah an sempui a ni.

Central YMA pawhin nimin zing dár 9:30 khan CYMA Office aṭangin tui thianghlim (mineral water) báwm 1,023, litre 12,276 an thawn thla leh. CYMA-in a thawh hnihna atana tui an thawn thlak hi Aizawla YMA branch 21-te'n a thawh khawm báwm 818 leh, mimal leh kohhranin an thawh khawm báwm 205 a ni.

YMA branch ṭhenkhat, tui thawh remchang thei lo branch 14 chuan Rs 50,300 an thawh khawm a; mimal, páwl leh kohhran aṭangin CYMA chuan Rs 52,200 a dawng bawk. Pawisate chu Silchar YMA hnenah pek tum a ni. Nimina tui phurh nan hian YMA branch pariatin lirthei an thawh a, CYMA leh mimal lirtheite nen lirthei 11 hmangin phurh thlâk a ni a, nimin vêk khan Cachar DC aiawhin sorkar official-te'n an dawng.