JJM bawhzui chak turin sorkar phût
MPC president Lalhmangaiha Sailo chuan, thingtlanga in tinin an in chhung ngeia tui thianghlim an herh haw theihna tura Prime Minister proramme duan, Jeevan Jal Mission chu Mizoramah hlawhtling taka hlen a nih ngei theih nan chak taka hma la turin Mizoram sorkar a phût.
Lalhmangaiha Sailo hian nimin khan thuchhuah siamin, Brig. T Sailo kaihhruai sorkar a din laia Mizoram khaw tina in tinah hnianghnar taka tui in tur ṭha pek an buaipui chu a hnua sorkarte'n an vei zui loh avangin, tun thlengin Mizorama khaw hrang hranga in tinah tui herh haw theih a la ni lo tih a tarlang a, "Hei hian ram hruaitute'n thingtlanga chêngte an ngaihthahzia a tichiang hle," a ti.
Hunbi ruat chhunga JJM tihhlawhtlin nan Prime Minister leh Jal Shakti Minister ten sum ṭhahnem tak Mizoram sorkar an pek tawh cheng vbc. 68 chu felhlel taka hman a ni tih sawiin Lalhmangaiha chuan, "CM Pu Zoramthanga'n khak leh hauh a tawrh phah hial a ni," a ti a; mualphothlak an tih thu a sawi.
Lalhmangaiha Sailo chuan, JJM tihhlawhtlinna atana kum 2020-21 chhunga sum hman tur chu vbc. 110 a ni tih sawiin, "Hei bakah hian state matching share cheng vbc. 12 chu belh ve turin Central-in kan koah a nghat a, December 2022-ah chuan JJM programme hi hlen chhuak ngei turin Central-in kan sorkar a hriattir a ni,'' a ti.
MPC President chuan, sorkar laipuiin Mizoram sorkar kuta sum a dah tawh chu thingtlanga in tina tui connection pek nan hmang nghal turin Mizoram sorkar a phût a; state matching share tur sum Mizoram sorkarin a neih dawn loh ai chuan, a tel loa mipui an la awm theihna - football field, hall, pavement contract, publication, administration, bamboo mission atana sensote ti rih lo turin sorkar a phût bawk.