Serchhip dist.-a leivung paih dan enfiah

Serchhip District Monitoring Committee on Implementation of JICA on NH-54 chuan, additional DC Lalmuansanga Ralte hoin nimin khan Serchhip district-a NH-54 kawngpui zauh hna thawh meka leivûng paih dan an endik a; NHIDCL hotute leh an hnuaia contractor-te nen hnathawh meka thil fel tâwk lo awm nia ngaihte an sawiho.

Endiktute chuan Khumtung aṭanga ṭanin, Gawar-SCCPL (JV)-in Serchhip district-a hna an thawhte an en hmasa a; kawng kama spoil bank pahnih, a thlang lama Tuirini lui awmna chu pawm theiha an ngaih loh avangin thla hnih chhungin hman tlak hmun dang dap turin an hrilh a ni.

Kram Infra Construction pisa conference hall-a inkawmhonaah Monitoring Committee chuan, NHIDCL aiawhte leh an hnuaia contractor-te chu chak taka hna thawk tur leh sorkar laipuiin ramngaw leh nungchate leh a chhehvel ramte himna tura dan a siamte ṭha taka zawm turin an hrilh.

Serchhip-Chhiahtlang by-pass road bikah hna ṭan theihna khawp environment clearance (in principle approval) an la nei lo chu a rang lama ûm zui turin an chah a, leivung paihna hmun atana thlanah chauh leivûng paih ngei tur te, leivûng paih tawhna kalsan ngaite chu mumal taka a dâwlna an siam phawt loh chuan chhuahsan tawp an remtih loh thute an hrilh bawk.