KHAWTHLIR

Thisen pe
Helen Lowry Higher Secondary School NSS unit chuan nimin khan an sikul auditorium-ah thisen pek an huaihawt a, Civil Hospital, Aizawl tan unit 55 an pe a, petute mipa 44 leh hmeichhia 11 an ni.

Vety Registrar
Mizoram sorkar chuan Mizoram State Vety Council registrar atan Dr Saihlira a ruat. Dr Saihlira hi AH&Vety additional director a nih laia pension a ni a, registrar hi kum khat chhung chelh tura tih a ni.

Ruihhlo man
Mizoram police CID (Crime) hnuaia Special Narcotics PS team chuan June 27, Thawhṭanni khan Kunal Limbu (22) s/o Rithe Limbu, Bawngkawn, Eric Lalropuia (20) s/o Lalramthara, Bawngkawn leh kum tling lo mi pakhatte hnen aṭangin ganja gram 166.6 leh Codein (Codivit-T) bûr 29 an man.

AR-in meizial man
8th Assam Rifles sipaite chuan nimin leh Thawhṭanni khan Khawbung, Tlangsam leh Zokhawtharah ram dang meizial báwmpui 165 an man a, Champhaia Customs department hnenah an hlan. Foreign cigaratte an mante chu cheng vbc. 2.25 man a ni.

YMA hnatlangpui
Central YMA leh PHE department chuan July 2, Inrinni khian Tlawng lui fintu lui hrang hrang thenfai hnatlangpui huaihawt an tum. Hnatlangah hian Aizawla YMA branch zawng zawngte leh Tlawng lui hnaiha awm YMA sub-headquarters leh group-te tel turin CYMA chuan a ngen a, branch tin aṭangin mi 10 tal thawk chhuak tura beisei a ni.

Hnathawh thlirho
Kolasib District Develop­ment Monitoring & Coordination Committee chu an chairman C Lalrosanga, Lok Sabha MP hoin nimin khan an ṭhukhawm a, Kolasib district-a hmasawnna hna thawh tawh leh thawh mekte an thlirho. Kolasib district-a MLA pathum zinga pahnih - K Lalrinliana leh K Laldawnglianate pawh an tel.

FDA review meeting
Health & Family Welfare department hnuaia Food & Drugs Administration chuan nimin khan Health Directorate conference hall-ah ni hnih awh tur Review Meeting on Food & Drugs an hmang a, vawiinah chhunzawm a ni ang. Review meeting-ah hian FDA hnuaia thawkte an tel a, FDA deputy director Lalliantluanga'n kaihhruaiin, FDA joint director Lalsawma'n thu a sawi a ni.

MLA-in enfiah
Tuikum bialtu MLA Lalrinawma, dy. speaker chuan nimin khan a bial chhunga Darlawnga MLA fund hmanga thawh, khaw chhung lane kawng PCC flooring leh khawtlangin kuhva an chinna hmun panna tur laih mekte a tlawh a, hnathawh dan a enfiah. Lalrinawma chuan hriselna, eizawnna leh zirnate chu a ngaih pawimawh hmasak ber berte an ni thu a sawi.