Aizawlah Covid-19 vei hmuh chhuah a pung

June 27, Thawhṭanni khan Mizoramah swab sample 272 endik aṭangin Covid-19 vei mi 41 hmuh chhuah a ni a, a tam ber chu Aizawl khawpuia mite an ni. Nimin khan hripui vei dam tawh mi 21 chhuahtir an ni a, Covid-19 vanga thi an awm lo.

Thawhṭannia hripui vei hmuh tharte chu mipa 17 leh hmeichhia 24 an ni a, ZMC RT-PCR labiratory-a hmuh chhuah mi pakhat leh RAT hmanga hmuh mi 40 niin, positivity rate 15.07% a ni. Mi 41 zinga 31 chu Aizawl khawpuia mite an ni.

IDSP record angin, Mizoramah Covid-19 vei 2,28,945 hmuh chhuah a ni tawh a, mipa 1,06,584 leh hmeichhia 1,22,361 an ni a, mipa aiin hmeichhia 15,777-in an tam zawk. Nimin tlai dar 5 thleng khan mi 2,28,075 (99.62%) chhuahtir an ni tawh a, mi 703 (0.31%) thi tawhin, enkawl mek mi 167 (0.07%) an awm.

Nimin tlai dinhmun angin, Mizorama district 11 zingah Covid-19 positive awm tawh rih lohna district pali - Siaha, Champhai, Lawngtlai leh Khawzawl district-te a awm a; positive active case tamna ber Aizawl district-ah mi 101 an awm mek a, Serchhip district-ah mi 29 an awm mek bawk.