Myanmar aṭanga lak luh nia hriat Kuhva rah Zamuangah hâl a ni

Hachhek Bial Kuhva Chingtu Pawl (HBKCP) duty-te chuan nizan hmasa, Thawhṭanni zan zanlai pelh hnu khan Zamuangah kuhva rah Tripura/Assam lama phurh chhuah tur ip 285 an man a, truck aṭanga hlàn thlâk a nih hnuah nimin chawhma lam khan hâl a ni.

HBKCP president Lalzawna chuan Vanglaini palai zawhna chhángin, Vairengte kudam aṭangin Myanmar lam aṭanga lak luh kuhva rah phurh chhuah a awm thu an dawn avangin an duty a, kuhva rah leh a phurtu truck chu an lo man tih a sawi.

Lalzawna chuan, kuhva rah an man chu tih zui dan tur ngaihtuahin chawhma dar 10 aṭangin pawl hruaitute an ṭhukhawm tih sawiin, "Kan ṭhut khawm hlanin an lo hâl a, kan ṭhutkhawmnaah hian tih zui dan tur kan ngaihtuah a, FIR turte pawh kan buaipui a, chutih mek lai chuan hâl a ni," a ti.

Kuhva rah man leh hâl chu police-te'n an ngaihven tih sawiin Lalzawna chuan, "Police-te an rawn kal a, mahse, keini pawhin kan hriatpui loha hâl a ni a, hâlna hmunah police-te an thlenin tumah hmuh tur an awm tawh si lo a, thubuai ziah luh a ni lo," a ti a; Myanmar aṭanga kuhva rah lâk luhin kuhva chínga an eizawnna a tihchhiat em avangin mipui an thinrim tawh hle thu a sawi.

HBKCP President chuan, kum dangah chuan June thlaah an kuhva rah leitu tur vaite nen inremna an ziah ṭhin thu sawiin, "September thla velah kan lo ṭhin. Kuminah erawh chuan vai ho hian an hlauthawng a, an rawn lang meuh lo," a ti.