Central Hindi evaluation team-in Mizorama sikul 77 an enfiah tawh

Centrally sponsored scheme (CSS) hnuaia Mizorama Hindi zirna kalpui dan dinhmun zir chiang tura sorkar laipuiin evaluation team a rawih, Awadh Research Foundation, Lucknow, Uttar Pradesh aiawhte chuan district pangaah sikul 77 an enfiah tawh a; endik hmabak sikul 15 a la awm.

Central third party evaluation team hi mi pahnih an ni a, April 5, 2017-ah an rawn thleng a, an thlen tûk aṭangin endik hna an thawk ṭan nghal. Aizawl district-a sikul tlem azawng an enfiah hnuah Lunglei an pan.

Awadh Research Foundation mite hian Mizorama district panga fang turin ruahman an siam a, team pahnihah insiamin, Lunglei, Champhai, Kolasib leh Serchhip district-te an tlawh zo tawh a, Aizawl district an fang mek.

District hrang hrangah hian middle school leh high school-te an tlawh kual a, thawktute an kâwm a; Lunglei district-ah sikul 24, Champhai district-ah sikul 22 leh Kolasib leh Serchhip district-ah sikul 10 ve ve an tlawh tawh. Nimin khan Kolasib district-a an fan turte an fang zo a, tlaiah Aizawl an pan a ni.

Aizawl district-ah hian nimin thleng khan sikul 11 an tlawh tawh a, tlawh hmabak sikul 15 an la nei. Kolasib aṭanga team pakhat zawk rawn letin vawiin aṭangin an pui ṭan dawn a ni.

Evaluation team hi School Education deputy director (Hindi) Lalchungnunga'n a zui a; district-a an kalna apiangah an kalna district-a School Education department officer te, sikul zirtirtute leh CSS Hindi teacher awm remchangte'n an lo ṭawiawm zel bawk.

Vanglaini palai zawhna chhangin Lal­chungnunga chuan, evaluation team hian an kalna khawpuiahte hian CSS hnuaia Hindi zirtirtu awmte ko khawmin, zawhna hrang hrang an zawt ṭhin tih a sawi a, "CSS Hindi teacher-te hian an ṭawiawm ṭha hle a ni," a ti.

Awadh Research Foundation hian Mizorama an tih turte an tih zawhah sorkar laipuia Ministry of Human Resource Development-ah report an pe dawn a; an report azirin CSS hmanga Mizorama Hindi zirna kalpui chhunzawm leh chhunzawm loh turah sorkar laipuiin thutlukna a siam tura ngaih a ni.

Mizoramah February 18, 2011 aṭangin CSS hnuaiah Hindi zirtirtu 1,305 rawih an ni ṭhin a, rawih hun chu kumin February 28 khan a tawp. An hlawh chu sorkar laipuiin a vaiin a tum a ni. MHRD duh dan angin Appointment of Language Teacher scheme chhunzawm zel tur chungchangah zirchian hmasak (third party evaluation) phawt tura tih a ni a, chu vang chuan MHRD chuan Mizoramah evaluation team a rawn tír a ni.