Salvation Army hotu Aizawlah SA Centenary lawm ṭan a ni

Khawvel puma Salvation Army hruaitu lu ber, Gen. Andre Cox leh a nupui Silvia Cox-te chuan nimin khan Aizawl an rawn thleng a; Salvation Army India Eastern Territory (IET)-in kum za tlin, centenary an lawmna an hmanpui ang.

Gen. Andre Cox-te nupa hi nimin chawhnu khan Lengpui Airport-ah Mizorama Salvation Army hruaitute'n an lo hmuak a, Mizoram state sorkar mikhual (state guest) a ni.

Aizawla a chàm chhungin Chanmari West Corps biak-in sak thar leh Family Store a hawng dawn a; SA Officer Council a hmanpui bawk ang.

Salvation Amry IET centenary lawmna hi nizan khan R Dengthuama Indoor Stadium, Aizawlah ṭan a ni a, centenary meidet chu Gen. Andre Cox-a'n nizan khan a dep kai a ni.

SA IET centenary hi April 30, 2017 thleng lawm a ni dawn a, vawiin April 26 hi Mizorama SA din champha tak chu a ni. Vawiin hian ni lengin R Dengthuama Indoor Stadium-ah centenary an lawm chhunzawm dawn a, inkhawm apiangin Gen. Andre Cox-a'n thuchah a sawi ṭhin ang.