World Malaria Day hman a ni

Nimin, April 25 kha World Malaria Day a ni a, Mizoramah pawh State Vector Borne Diseases Con­trol Programme (SVBDCP) bultumin Aizawl­ah hman a nih bakah, district dangahte pawh hman a ni.

Aizawla IPR Audito­rium-a World Malaria Day hmanna inkhawmah Health secretary Lalrinliana Fanai khuallian a ni a; khuallian chuan, "World Malaria Day-ah kum tin sikserh chung­chang thupui hrang hrang hman a ni ṭhin a, sikserh natna hi mi tam takin an la thihpui cheu avangin nuai bo a, sikserh vanga thihna tihtlem tumin nasa lehzuala hmalak mek a ni," a ti.

Lalrinliana Fanai chuan, "Malaria case pakhatmah awm tawh lo tura ṭan lak hi Health department mawh­phurhna a ni," a ti a; SVBDCP hmalakna, tlawm­ngai pawl hrang hrangte inpekna leh mipui ṭawiawmna vangin Mizoramah sikserh a tla­hniam zel a, sikserh vanga thihna pawh a tlahniam telh telh niin a sawi.

Health Secretary sawi danin, kumina World Mala­ria Day thupui chu ‘End malaria for good’ tih a ni a; Mizorama sikserh tlak-hniam chhan pawimawh tak pakhat chu damdawia chiah sa thosilen (LLIN) sem vang leh mipui ṭawiawmna vang a ni. LLIN hi kum 2016 chhung Mizorama khaw 731-ah sem a ni.

World Malaria Day hman­na inkhawm hi Health principal director Dr F Lallian­hlira'n a kaihruai a; Health Services joint director (Malaria) Dr HC Thang­kima, SVBDCS-a state programme officer ni bawkin Day thupui, 'End malaria for good’ tih a sawi.

Report-a a lan danin, Kum 2016 chhung khan Mizo­ram pumah mi 2,67,747-te thisen endik a ni a, sikserh vei mi 7,583 hmuhchhuah niin, PV mi 1,676 leh PF mi 5,907 an ni. Kum 2016 chhungin sikserh vangin mi pakua an thi.

Kumina thla thum, January-March chhungin hi 35,801 thisen endik tawh a ni a, chu'n zinga mi 582 chuan sikserh an vei tih hmuh chhuah niin, PV mi 96 leh PF mi 486 an ni.

Mizoramah kum 2015 khan sikserh vei mi 26,400 an awm a, chu'ng zinga mi 3,801 chu malaria PV niin, mi 22,599 chu PF an ni a; sikserh vanga thi mi 21 an awm.

Kum 2015-ah hian kum 2014 aiin sikserh vei hmuh chhuah mi 3,295-in an tam zawk a, sikserh vanga thi erawh chu kum 2014-a thi zat mi 31 aiin kum 2015-ah an tlem zawk (21) thung.

Kuminah hian damdawia chiah sa thosi lên (LLIN) mamawh zualte hnenah sem a ni leh dawn a, mi 1,000 zela pakhat leh a aia tam sikserh vei awmna hmunah sem tum a ni.

Health department chuan, mi tinte chu zanah thosi lên zár ngei tur te, thosi hlauh leh huat chi cream, Tortoise, Mortein, All Out-te hmang turin an chah a, "Sikserh thlentu anopheles thosi laka him nan mahni in leh a vel vawnfai leh thosi pian theihna tui tling reng reng tihbo hi mi tin tih theih leh mawhphurhna a ni," an ti.