Mizoram hmar lamah Jan-March 2017 Chhungin thubuai 498 ziah luh a ni

26th April, 2017

Mizoram police-a Northern Range (NR) hotute chuan nimin khan DIG (NR) C Laldina pisaa crime review meeting an nei. Kum 2016 leh 2017-a thla thum, January-March chhunga thubuai ziah luhte dinhmun an zir chiang. January-March chhungin kuminah thubuai 498 ziah luh a ni a, hei hi kum 2016-a ziah luh 618 aiin 120-in a tlem zawk.

Meeting-a tarlan danin, kum tìr lam thla thum chhunga thubuai ziah luh hi kum 2016 aiin kuminah 19.41%-in a tlem zawk a; kum 2016-ah IPC hnuaia ziah luh thubuai 540 leh dan dang hnuaia ziah luh thubuai 78 a awm a, kuminah chuan IPC hnuaiah thubuai 422 leh dan dang hnuaiah 76 a awm. IPC case hi kuminah 118-in a tlahniam a, non-IPC case chu pahnihin a tlahniam thung.

Kumin January 1 - March 31 chhunga NR huam chhunga thubuai ziah luh zinga tam ber chu rukruk niin, thubuai 197 ziah luh a ni a; a dawttu, mi rawk thubuai 124 ziah luh a ni.

Tualthah thubuai panga a awm a, hei hi nikum aiin pangain a tam zawk. Tualthah thubuai ziah luh dan chu, Aizawl district-ah pathum, Champhai district-ah pakhat leh Serchhip leh Mamit district-ah pahnih ve ve a ni. Tualthah tum thubuai pakhat a awm.

Kumin thla thum chhung vêkin zu zawrh phalna leh khuahkhirhna dan, MLPC Act hnuaiah thubuai 31 ziah luh a ni a, nikum aiin 22-in a tam zawk. Kuminah NDPS Act hnuaiah thubuai 14, IT Act hnuaiah thubuai pahnih, POCSO Act hnuaiah thubuai 25 ziah luh a ni bawk.

DIG(NR) huam chhungah hian thubuai la chhui zawh loh (pending mek) 76 a awm a; chu'ngte chu Aizawl district-ah 25, Champhai district-ah 25, Kolasib district-ah 11, Serchhip district-ah pasarih leh Mamit district-ah pariatte a ni.

DIG (NR) C Laldina chuan, dan leh thupek kenkawhnaah, a bikin mipui nena inhmachhawnnaah police hmel a balh leh leh ṭhin thu sawiin, police station level aṭanga ṭan lak a ṭul thu a sawi a; police-te chu force an nih angin, an duty ṭha taka ti tura ngaih an nih thu sawiin, police-te chu inthununna ngai pawimawh turin a chah.

C Laldina chuan, ruihhlo do kawngah YMA-te nen pheikhai rual taka thawkho tur an nih thu sawiin, district tina SP-te chu an huam chhung ṭheuha ṭan la lehzual turin a fuih a; ruihhlo man chungchanga danin a phût angte ṭha taka ti ṭhin tur leh VDP-te pawh thuaithar leha hmang ṭangkai turin a chah bawk.