KHAWTHLIR

Dan inzirtir
Social Welfare Department (SWD) leh Mizoral State Legal Services Authority (MSLSA)-te chuan, nimin khan SWD directorate conference hall-ah service provider-te tan dan kaihhnawih thilte inzirtirna leh inhrilhfiahna a hun an buatsaih. SWD official-te leh MSLSA hotute bakah, service provider hrang hrangte an tel a ni.

Heroin man
Excise & Narcotics department (END)-a Anti-Narcotics Squad-te chuan, nimin chhun dar 11 khan Ṭhuampuiah heroin gram 6 leh a neitua puh Ralkapthanga (43) s/o Rinzuala, Zuangtui Vengthar nia insawi an man. Champhaia END pawhin nimin chawhma dar 10:30 khan New Champhaiah heroin gram 13 leh a neitua puh Vanlalhnema (26) s/o Malsawma, Rangvamual, Aizawl nia inchhál an man bawk.

Thliin in lên thlu
April 24, 2017 chhun dar 12 vela thlipui thawkin Kawlkulh Workshop Venga Lalṭhazuali in, Assam type chu lèn thlu a, in a tlûk laiin a chhungah mi an awm loh avangin mihring thi leh hliam an awm lo. Thlipui hian in dang pathum pawh a chung rangva ṭhenkhat a lên chhe bawk.

LWA Day lawm
Lai Women Association (LWA) chuan April 24, 2017 khan an din champha vawi 21-na an lawm. Lawngtlaia damdawi-in pathum - District Hospital, Lairam Christian Medical Centre leh Christian Hospital-a damlo rethei zualte ṭanpui nan poor fund-ah Rs. 3,000 an pe a; LWA branch ṭhenkhat chu khawlai tifaiin an hnatlang bawk. LWA-ah hian branch 65 leh member 5,000 chuang an awm mek a ni.

Director-ah kai
Tourism department-a joint director Biakthanmawia Pautu chu MPSC rawtna angin director-ah a kaisang. Hemi chungchanga hriattirna hi nimin khan tihchhuah a ni.