Kum 2016-17 chhungin ni 49 inhlawh

Mizorama Centrally sponsored scheme (CSS) hrang hrang kalpui dan en zuitu, State Level Vigilance & Monitoring Committee chu nimin khan Rural Development minister R Lalzirliana hoin Secretariat Conference Hall-ah an ṭhukhawm. He hunah hian kum 2016-17 chhungin MGNREGA hnuaia inhlawhna district tinah ni 49 zel siam a nih thu an tarlang.

Meeting-ah hian an ṭhutkhawm hmasaka thurel bawhzui dante sawiho a ni a; kum 2016-17 sorkar kum chhunga MGNREGA-a Mizoram sorkarin a do letna sum chu State Planning Board leh Finance department-in a tihfel tawh thu te, PMAY-G/IAY, NRDWP leh scheme dangah pawh Planning leh Finance-in an tih turte an tihfel tawh thu tarlan a ni.

Mahatma Gandhi National Rural Employment Guarantee Act (MGNREGA) hnuai­ah kum 2015-16 sum hmuh tlai vanga kum 2016-17 atana hman tak (spill over) cheng vbc. 60 leh kum 2016-17 chhunga sum hmuh aṭangin district tinah ni 49 zel inhlawhna siam a ni a; kum kal mek, 2017-18 atan Mizoram tan a thawh khatna (first installment of first tranche) cheng vbc. 134.4909 chu sorkar laipui RD Ministry-in a rawn pe tawh.

Nirmal Bharat Abhiyan (NBA)/Swaach Bharat Mission (SBM) hnuaiah kum 2016-17 chhungin Mizoram pumah êk-in 2,236 sak a ni a, chungte chu below poverty line BPL chhungkaw 1,405 leh above poverty line (APL) 831 tana siam a ni.

Champhai district chu Open Defecation Free (ODF)-ah puan a ni tawh a, Serchhip district pawh ODF-a puan theih thuai a ni dawn thu an sawi.

National Social Assistance Programme (NSAP) hnuaia awm, Indira Gandhi National Old Age Pension Scheme (IGNOAPS)-ah kum 2016-17 chhungin dawngtu mi 25,469 an awm a; Indira Gandhi National Widow Pension Scheme (IGNWPS) dawngtu mi 2,310, Indira Gandhi National Disability Pension Scheme (IGNDPS) dawngtu mi 742 an awm. Kum 2016-17 chhungin NSAP hnuaia sum hmuh tawh nuai 1259.19 zinga 87.70% chu hman a ni tawh.

MzSRLM hnuaiah kum 2016-17 chhung­a sawrkar laipuiin Mizoram sorkara sum a rawn pek zat chu nuai 1186.34 a ni a, chuta ṭang chuan cheng nuai 916.76 chu hna thawh nan hman a ni tawh. Integrated Watershed Management Programme (IWMP) hnuaiah rain water harvesting structure 1,562 siam a ni a, self help group 339 din a ni tawh bawk.

Meeting-ah hian minister pahnih - Zo­dintluanga leh PC Lalthanliana, parliamentary secretary (RD) Lt.Col. ZS Zuala, MLA pahnih - Chalrosanga Ralte leh Lalrinawma te bakah, department hrang hranga secretary, director leh district bawrhsapte an tel a ni.

PMGSY hmanga kum 2016-17

Chhunga kawng siam dan

District Length

Aizawl Km. 45.67

Lunglei Km. 12.17

Siaha Km. 39.02

Champhai Km. 18.67

Serchhip Km. 74.01

Lawngtlai Km. 17.96

Mamit Km. 13.56