Tuiriala bawlhhlawh paihna sawn turin Court-ah zualko

Tuirial Airfield Veng khawtlang chuan an huam chhunga bawlhlawh paihna hmun sawn chhuahna thupek siam turin Gauhati High Court-ah ngenna an thehlut.

Tuirial Airfield khaw­tlang ukil sawi danin, Tuiriala bawlhlawh paihna sawn a nih theih nan Gauhati High Court, Aizawl Bench-ah July 2016 khan an YMA president Lianthawnga hmingin Mizoram sor­kara Land revenue & Settlement, UDPA, Aizawl Municipal Corporation leh Mizoram Pollution Control Board (MPCB) khinna an thehlut a ni.

An thu thlenah chuan, bawlhlawh paihna hmun chu mihring hriselna atan a hlauhawm vang te, naupang aṭanga puitling thlenga natna chi hrang hrang an kai ṭhin thu te, bawlhlawh paihna hmun chu mihring chenna bul hnai maia awm a nih thu te, bawlhlawhte chu hâl reng a nih vanga mei khû nasa takin an chenna leh a velte a tuam ṭhin thu leh chu chuan ngawr, typhoid leh vun natna chi hrang hrang a thlen ṭhin thute an tarlang.

Gauhati High Court chuan Mizoram sorkara LRS department, UDPA department, AMC leh MPCB-te chu insawifiah turin a hriattir tawh a; an chhanna Court-in a la dawng kim lo nia thu dawn a ni.

MPCB pawhin kum 2013 khan AMC chu Tui­riala bawlhhlawh hâl khu awm reng titawp turin an lo ngen tawh a, Zawlbuk Group YMA chuan bawlh­hlawh paihna hmun chu sawn a nih theih dan tur ngaihtuah turin AMC an ngen tawh bakah,

Central Pollution Control Board pawhin AMC chu ngaihven turin a lo hriattir tawh a ni.