Lunglei district-ah kum 2016-17 chhungin naupang 49 an thi

Nimin khan Lung­leia Heritage Centre-ah Lunglei district Child Death Review Sensitization Workshop buatsaih a ni a; Lunglei district-ah naupang thi kum 2015-16 chhungin 79 leh kum 2016-17 chhungin 49 an awm tih an tarlang.

Workshop hi Lungleia senior medical officer Dr Lalawmpuia'n a kai­hruai a; khuallian, Lung­lei chief medical officer Dr VLMS Dawngliana chuan, tun dinhmunah Lunglei district-ah infant mortality rate (IMR) sang lutuk lo mah se, IMR tihniam zel tur leh naupang kum 5 hnuai lam thihna tihniam zel turin nasa lehzuala hmasawn a ngaih thu a sawi.

Dr VLMS Dawng­liana chuan, Lunglei district chu Mizorama naupang thih tamna district pali zinga pakhat a nih thu sawiin, "Naupang thihna hi khawpuiah a tlem a, hmun kilkhâwrah a tam thung. Heng thihnate hi eng vanga thleng nge tih finfiah a, eng natna nge, eng nge a tlakchham tih kan hmuhchhuah hian rah ṭha tak kan a chhuak dawn a ni," a ti.

Workshop-ah hian Lunglei district-a dam­dawi-in hrang hranga medical officer te, community health officer te, Health supervisor te, private hospital aiawh te, ICDS, YMA, MHIP, BKHP leh MJA aiawhte an tel a; zawhna leh chhanna hun hman a ni.