Lawngtlaiah Covid-19 vei awm tawh lo

Lawngtlai DC Dr Andrew H Vanlaldika chuan nimin khan a pisaah thuthar thehdarhtute a kâwm a; an district mi leh sa Covid-19 vei Covid Care Centre (CCC)-a enkawl mi pariatte chu an swab sample endik nawnnaah hripui an vei tawh lo tih hmuh a nih thu a sawi.

Dr Andrew Vanlaldika chuan, Lawngtlai district-a Covid-19 veite swab sample chu June 24, 2020 zan khan Zoram Medical College (ZMC)-ah endik leh a nih thu sawiin, "An vaiin an negative vek a ni. Harsatna dang a awm loh chuan, sorkar kaihhruaina ang leh doctor-te thutlukna angin naktuk (vawiin)-ah chhuahtir an ni ang," a ti.

Lawngtlai DC sawi dan­in, an district aṭanga ZMC-a endik tura swab sample thawn tawh zawng zawng 784-te chu result hriat kim a ni tawh.

Lawngtlai chief medical officer Dr Lalthlamuana chuan, swab sample an thawn ang ang result hriat kim a ni chu lawmawm a tih thu sawiin, "Hetih lai hian June 19 hnu lama lo thlengte swab sample chu vawiin (nimin) aṭangin medical team-in an lâk chhunzawm dawn. Tun dinhmunah sample lak hmabak 48 a la awm a ni," a ti.

Thuthar thehdarhtute zawhna chhangin Lawngtlai District Hospital medical superintendent Dr Zothanpari Chhakchhuak chuan, Covid-19 vei mi pariat an enkawlte zinga mi pathumah nasa vak loin natna a lang chhuak hman tih a sawi a, "Tunah chuan an dinhmun a ṭha vek tawh," a ti. Dam­dawi-in an chhuahsan hnuah pawh an in lamah fimkhur taka inkhung hrang leh tura tih an nih thu a sawi bawk.