LC leh VC inthlan Hun hrana buatsaih turin ngen

Aizawl Municipal Corporation (AMC)-a Congress party councillor-te chuan nimin khan State Election Commissioner hnenah village council leh local council inthlan chu a ruala tih ni lo se an duh thu ziak leh ṭawngkáin an thlen.

Congress party councillor-te chuan, AMC a pian hnuah Aizawl khawpui chhunga village council-te chu local council tih an ni tih tarlangin, "Chuvangin, a hnuaia kan ziah lan hmang hian VC leh LC inthlan hi a rual loin, a kára hun âwl tlem awma min buatsaihsak turin turin kan ngen a che," an ti.

Congress councillor-te tarlante

    LC chu AMC ta a ni a, state sorkar hnuaia direct-a awm a ni ve lo a, VC erawh chu Local Administration Department (LAD) hnuaia awm a ni.

    LC-te chu an lawmman AMC-in a pek a ni a, VC erawh chu LAD-in a pe.

    LC siam belh leh paih chu AMC hna a ni a, VC erawh chu LAD kut a ni.