Inkharkhip kalphung siamṭha turin Congress ṭhalaiin sorkar an phût

Mizoram Pradesh Youth Congress Committee (MPYCC) chuan thu­chhuah siamin, Mizo­­rama inkhàrkhip chung­changa mipui harsatna ngun taka ngaihtuah chunga kal­phung siamṭha vat turin sorkar an phût.

MPYCC chuan, sor­kar chu local task force-te phaw anga hmang chunga task force-te mausàm leh si-ah an puh a; lirthei tlàn phalna mamawhtute'n niléng ṭhaka Traffic SP-a phalna an dil kher a ngai chu sawiselin, sorkarin ruahmanna a neih ṭhat tâwk loh avangin mipui tawrhna a thleng mek niin an sawi.

Covid-19 hripui léng vanga inkhàrkhip chhung a rei tawh avangin ni tin eichawp dap, chawhmeh zuar, lirthei hmanga eizawng, sumdawng leh kut hnathawktute'n hna an thawh theih loh avang­in an tuar nasa hle tih sawiin MPYCC chuan, "Mangang ru tak tak an tam tawh hle. Sorkar hnathawk ve lo tan lockdown hi phurrit a tling ta," an ti.

Congress ṭhalaite chuan, mipuiin dan leh thupek zawm duh mah se, rilṭám leh fairèl bél ruak chung chuan zawm vek a harsa tih sawiin, mipui harsatna ngun taka ngaihtuah chunga kalphung siamṭha vat turin sorkar an phût a ni.

Congress ṭhalaite chuan, "Dan leh thupek kenkawh lama hotu ber Home Minister ber a ngáwichàwi lutuk hian ngaih a tiṭha lo," an ti a; hri léng hlauh vanga tawmim leh ngawichawi nge a nih tih inpuang se an duh thu an tarlang.

MPYCC chuan, Home minister Lalchamliana chu hripui hlauh vanga a tawmim a nih pawhin, kal chhuak kher loin a mawhphurhna lian tak hlen turin ram mipui thlamuanna thuchahte puang chhuak ṭhin tura an duh thu an tarlang a, "Hrehawm pawh pawisa loa chhùn zàn zawma hmun hrang hranga duty police, medical staff leh task force-te thlamuanna thuchah puang chhuak ṭhin tal turin kan chah a ni," an ti.