Mipuite hriselna hi sorkar ngaih pawimawh ber zinga mi a ni - Thanzara

Aizawl Civil hospital tih­changtlunna hmanraw neih leh bun thar hrang hrangte chu nimin khan Health minister Lal Thanzara'n a hawng a; Minister chuan, mipuite hriselna chu sorkar ngaih pawimawh ber zinga mi a ni tih sawiin, "Doctor, nurse, para-medical leh technician-te bakah, khawl ṭha leh inzirna ṭha kan mamawh reng a ni," a ti.

Health Minister-in nimina a hâwn takte hi mi hrang hrangin a thawh khawm aṭanga thawktute duty-na tur Maruti van (emergency pool van) pakhat, Samsung Smart Health Care, New Delhi-in Digital X-Ray khawl cheng nuai 32 man leh ultrasound khawl cheng nuai 25 man an pek te, state medical library leh e-library te, VVIP tana siam cabin pakhat, khum paruk awmna Grace Cabin, upa lam tan bika siam khum pali awmna Geriatric Ward-te a ni.

Health Minister chuan, India sorkar leh Mizoram sorkarin mipuite hriselna a ngai pawimawh hle tih sawiin, "Kum upa lamte hriselna kan ngai pawimawh a, an tan khum pali awmna cabin siam a ni," a ti.

Minister chuan, Aizawl Civil Hospital chu nileng zankhuaa damlo leh mi chi hrang hrangte'n an bawh buai reng a nih vangin tihpalh thil thleng thei a ni tih sawiin, "Hna thawktute nena thu inman fuh loh leh inbah palh changte pawh a awm ve ṭhin. Chutiang vanga rilru hliam leh rilru na chunga damdawi-in chhuahsante pawh an awm palh thei a, hetiang thil thleng a lo awm tawh a nih chuan inhriatthiamna sang ber ka ngen a ni," a ti.

Health Minister chuan, Mizoramah doctor indaih lohna avangin a rang thei ang berin doctor 26 lak tum a ni a, written exam ngai loa interview chauh hmanga la turin Cabinet phalna nghah mek a nih thu a sawi a; doctor indaih lohna vanga harsatna awm mek chu hrethiam tur leh nghak hrâm hrâm tura mipui ngenin, "Doctor lak fel a nih hunah indaih loh zualna hmunah a rang thei ang bera dah nghal a ni ang," a ti.

Health Minister chuan, hriselna kawngah mipui leh pawlte nen nasa leh zuala thawhho zel a duh a sawi a; thawktute chu inthlahdah lo a, an hna ṭheuh ṭhahnemngai taka thawk zel turin a chah a ni.

Hmanruate leh cabin hawnna inkhawm hi Health principal director Dr F Lallianhlira'n a kai­hruai a; Health secretary Lalrinliana Fanai pawhin thu a sawi.