Khanpui-Tualbung kawng laih sawifiah

27th April, 2017

Public Works Department (PWD) chuan thuchhuah siamin, Khanpui leh Tualbung inkar kawng siam a nih dan an sawifiah a; hna thawhna atan cheng nuai 197.21 ruahman a nih thu an tarlang.

PWD tarlan danin, Khanpui-Tualbung kawng siamna atan hian Ministry of DoNER chuan NLCPR hnuaiah July 4, 2011 khan cheng nuai 197.21 a pe a, May 25, 2012-ah contractor C Lalhluna, Ramhlun hnenah hna thawhna tur cheng nuai 165.238 pek a ni.

Khanpui-Tualbung kawng hian Lailak khua a paltlang a, tuna kawng siam mek 'Khanpui to Tualbung Road, Phase-I' chuan Khanpui leh Lailak inkar km. 2 leh Lailak leh Tualbung inkar km. 5 (out of km. 16.70) a huam a; he Road Project pumpui thui zawng chu km. 7 a ni.

Kawng hi PWD Schedule of Rate 2008-a DPR estimate siam a ni a, DoNER-in kum 2011-ah sanction a pek chhuah tawh avangin tunah chuan a man a sang tawh (price escalation) a ni. Hetih rual hian, Khanpui-Lailak (km. 2) chu scheme dang, PMGSY aṭangin laih a lo ni tawh a, culvert-te leh retaining wall-te erawh chu la siam loh a ni.

Khanpui-Lailak inkara culvert-te leh retaining wall te, Lailak-Tualbung (km. 5) kawng laih, tuihâwk luankawr siam, culvert leh retaining wall siamte chu PWD Schedule of Rates 2010 hmangin estimate siamṭhat a ni a; chumi hmang chuan December 13, 2011-ah Mizoram sorkarin cheng nuai 197.21-in administrative approval a pe.

Hna hi Phase-I chauh a la nih avangin pavement a la tel lo a, contractor-in a thawh zawh tawh zingah retaining wall leh hume pipe culvert ṭhenkhat siamte duhthusama a ṭhat loh avangin siam ṭhattir leh a ni. He hna pumpui thawh zawh hun tura ruahman (revised target date) chu March 31, 2017 a ni.

Project atan hian DoNER-in sum 90% leh state sorkarin 10% an tum a, tun thlenga sum hmuh tawh chu nuai 138.12 niin chu chu sum ruahman pumpui aṭangin 70.04% a ni a; DoNER aṭangin nuai 124.31 leh state sorkar aṭangin nuai 13.81 hmuh tawh a ni.

NLCPR hnuaia hna thawhte hi sorkar laipui aṭanga sum pek chhuah a muan ṭhin avangin Khanpui-Tualbung kawng siam hna pawh tun thlenga zawh theih a la ni lo niin PWD chuan an tarlang.