Kuminah TB vei mi 459 hmu chhuak tawh

Revised National TB Control Programme (RNTCP) chuan nimin khan IPR directorate conference hall-ah review meeting an nei a; kumin January-March thla chhungin ngawr (TB) natna vei mi 459 leh TB leh HIV vei kawp mi 16 hmuh chhuah a nih thu an tarlang.

Meeting-a tarlan danin, kumin tir lam thla thum chhungin TB vei nia rinhlelh mi 1,992 endik niin, chung zinga 459 chuan TB an vei tih hmuh chhuah a ni a, TB leh HIV vei kawp mi 16 leh TB natna khirh zual MDR-TB vei mi pakua hmuh chhuah a ni bawk. Hetih lai hian TB vei tih dam zat chu a vei hmuh chhuah zat aṭangin 86% a ni.

Kum 2016 chhung khan Mizoramah TB vei mi 2,149 hmuh chhuah an ni a, TB leh HIV vei kawp mi 204 awmin, MDR-TB vei mi 45 an awm. TB vangin mi 29 an thi a ni.

Review meeting-ah hi state TB officer Dr Vanlalfela'n kaihruaiin, Health Services director Dr H Lalchungnunga'n a hmanpui a; district tina TB officer-te an tel a ni.