KHAWTHLIR

Maxicab chesual
Nimin zing khan Shillong leh Aizawl inkara tlan Mizoram maxicab chu Meghalaya-a Lumsnong bulah a chesual a, a hmunah J Zobawiha (37), Lunglei Ramthar Veng a thi. Passenger dangte pawh an hliam a, Jowai Hospital leh NEIGHRIMS-ah lak an ni.

Thisen pe
Lungdai Hmarveng Presbyterian Kohhran chuan, an kohhran kum 10 tlin lawm nan nimin khan Aizawl Civil Hospital tan thisen unit 31 an pe a, a petute mipa 25 leh hmeichhia paruk an ni.

Vawktê sem
AH&Vety department chuan April 25, 2017 khan Durtlang Vety Dispensary biala NLUP hnuaia vawk vulh thlangtu chhungkaw 23 hnenah tual vawk pathum ṭheuh sem a ni. Durtlang Vety Dispensary bialah hian NLUP third phase leh fourth phase-ah chhungkua 192-in vawk vulh an thlang a, chhungkaw 84 hnenah sem a ni tawh.

YMA conference
YMA, South Vanlaiphai group chuan nimin aṭang khan South Vanlaiphai community hall-ah group conference an hmang a, bialtu MLA John Siamkunga'n a hmanpui. John Siamkunga chuan, Darzo, South Vanlaiphai, Muallianpui, Lungpuitlang leh South Lungleng khuatea hmasawnna hna thawh nan term hnih chhungin Rs. 22,04,36,407 hmuh a nih thu a sawi.

Têkin deng hlum
April 25, 2017 chhun lama ruahsur laiin Kolasib district-a Chemphaia leilet enkawltu, Samshul (15) s/o Tomis chu ṭêkin a dêng a, a hmunah a thi nia thu dawn a ni.