Salvation Army-in centenary lâwm mek

Salvation Army (SA) India Eastern Territory (IET) chuan R Dengṭhuama Indoor Stadium-ah an kum 100 tlin, centenary an lawm mek.

Nimin khan Mizoram Governor Lt.Gen. Nirbhay Sharma-a'n a hmanpui a; centenary lawmna hi khawvel puma SA hruaitu lu ber Gen. Andre Cox leh a nupui Com. Silvia Cox ten an hmanpui bawk.

Centenary lawmna hi April 25, Thawhlehni zan khan R Dengṭhuama Indoor Stadium-ah ṭan a ni a, stadium kawtah centenary mei dêtin, SA IET territorial commander Com. Lalngaihawmi’n a dep kai a; chumi hnuah inkhawm an nei chhunzawm a ni.

Nimina SA centenary lawmna inkhawm hi Governor Lt.Gen. Nirbhay Sharma leh a nupuiin an hmanpui a; Larsap chuan, SA IET-in an kum 100 tlin an lawmnaa an tel thei chu vannei a intih thu sawiin, SA hnathawhte chu fakawm a tih thu a sawi a, SA-te chu mi dang tana malsawmna ni zel turin duhsakna a hlan.

Governor chuan, Kristian sakhua chu India rama sakhaw zuitu nei tamah pathumna a nih thu sawiin, "Kristian tam zawk chu Nagaland, Megahalaya leh Mizoramah an awm a ni," a ti a; kal khawmte chu Isua hnung zui a, mi hnuaihnung, hnuchham leh baihvaite tana rawngbawl zel tura a chah rualin damdawi hmansual, ruihhlo ngawlvei leh HIV/AIDS do kawnga ṭan la turin a fuih a ni.

Nimina SA IET centenary lawm­naah hian zaipawl, malzai leh rimawi tumte ngaihthlak a ni a, Gen. Andre Cox-a'n thuchah a sawi. Chawhnu lamah Gen. Andre Cox chuan Salvation Army Officer Training College-a Lt.Col. Kawlkhuma lim (statue) a hawng bawk.

Salvation Amry IET centenary hi April 30, 2017 thleng lawm a ni dawn a, chawhma, chawhnu leh zanahte inkhawm a awm ṭhin ang. SA hruaitute chuan, centenary lawmna hmanpui turin mi zawng zawng an sáwm a ni.

April 26, nimin kha Mizorama SA din champha a ni a; Lt.Col. Kawlkhuma’n Shimla-a SA officer a zir zawhah April 26, 1917 khan Mizo­ramah a rawn let a, chu chu Mizo-rama SA din champhaa pawm a ni.