MKSP leh e-SHG hawn a ni

Rural Development minister R Lalzirliana chuan, nimin khan Assembly conference hall-ah Mahila Kisan Sashaktikaran Pariyojana (MKSP) leh Digital SHG Book Keeping System a hawng.

Village organisation aiawha khaw hrang hranga mi 64 hnenah e-SHG hmanna tur tablet sem nghal a ni.

MKSP leh Digital SHG Bookkeeping System hawn a ni chu lawm­awm a tih thu sawiin R Lal­zirliana chuan, Mizoram State Rural Livelihood Mission (MzSRLM)-in thing­tlanga mi harsa zawkte hmasawnna tura chak taka hma an lak thu a sawi.

RD Minister chuan, MKSP tum ber chu - thingtlang lo nei mite tan kal­phung ṭha zawk leh daih rei zawk kawhhmuh, ranvulhna lam tihhmasawn, ramngaw tihche­reuna tihtlem, thei leh thlaite daih rei zawk tura senga enkawl leh, thingtlang mite thil thar chhuah leh siam chhuahte hralhna tur dappui a nih thu a sawi a, "MKSP hmalakna hnuaiah chhungkuate sum lak luh a pun a, eizawnna ngêlnghet an neih phah ngei ka beisei," a ti.

Zira chuan, fair leh exhibition neihna tur hmun leh kut hnathawktute'n an kutchhuak an pholanna tur hmun ṭha NEDP hnuaiah siam turin Agriculture directorate sak ṭhat a nih tur a sawi a; Mizorama self help group-te data hrang hrang awlsam zawka lak khawm a nih theihna tura siam Digital SHG Book keeping System (e-SHG) chu ṭangkai taka hmang turin kalkhawmte a chah bawk.

MKSP leh e-SHG hawnna inkhawm hi RD secretary Lal­hmingthanga'n a kaihruai a, MzSRLM chief operating officer Vanlalroluahpuia’n MKSP chung­chang sawifiahin, state mission manager Ruth Lalawmpuii'n Digital SHG Book Keeping a sawifiah thung.

Parliamentary secretary Hmingdailova Khiangte, MLA pahnih Lal­rinmawia Ralte leh Vanlalawmpuii Chawngthu ten an hmanpui bawk.

Mizorama MKSP bul ṭan nan MzSRLM hnuai­a resource block pali - Thingdawl, Bilkhawthlir, Serchhip leh East Lungdar RD Block-te thlan a ni a, heng RD Block-ahte hian kum thum chhung kalpui phawt tum a ni. Resource block aṭang hian MzSRLM hnuaia SHG-a tel loneitu chhungkaw 5,000 chu MKSP chhunga enkawl tum a ni a, a kum lina aṭangin RD Block dangah ṭan leh tum a ni.

Digital SHG Book keeping System (e-SHG) hi India rama SHG-te sum chêt vel dan langtlang taka en theihna tura duan a ni a; Ministry of Rural Development siam 'My SHG App' chu download in, khaw hrang hrangah hman tur a ni.