Vety College-in ar notê sem

College of Veterinary Sciences & Animal Husbandry, CAU, Selesih chuan nimin khan Tanhril, Bawngkawn leh Selesihah Tribal Sub-Plan Project (TSPP) kaltlangin ar notê leh ar chaw ṭhahnem tak an sem.

CVSAH hian Tanhril community hall-ah Tanhril, Sakawrtuichhun, Luang­mual leh Chawlhhmun venga ar vulhtu chhungkaw 46 hnenah ar notê leh a chaw an sem a; Bawngkawn Local Council hall-ah leh Selesih YMA Hall-ah Bawngkawn leh Selesiha chhungkua 30 hnenah an sem bawk. Nimina ar note an sem zawng zawng hi 1,768 a ni.

TSPP hnuaiah hian CVSAH chuan vawktê leh bawngpui eng emaw zat ran vulhtute hnenah a lo pe tawh bawk. He project hnuaiah hian agriculture leh horticulture hmalakna pawh an kalpui mek a ni.