Sorkarin duhkhawp doctor lak tur a hmu lo - Health Minister

Lunglei Nursing School chuan April 25, 2017 khan an auditorium-ah Graduation Day vawi 19-na an hmang a, Health minister Lal Thanzara'n a hmanpui. Minister chuan, sorkarin a duhkhawp doctor lak tur a hmuh loh thu a sawi.

Health Minister chuan, Mizoram sorkarah doctor indaih lohna a nasat thu sawiin, chumi vanga harsatna thleng mek chu vanduaithlak a tih thu a sawi a, "National Health Mission hnuaiah doctor tam tak lak tur an awm laiin, doctor-te'n mahni in lum aṭanga hna thawh an duh zawk avangin kan hmu zo ṭhin lo," a ti.

Lal Thanzara chuan, NHM aṭanga doctor lak an duh reng laiin, sum harsatna avangin Mizoram sorkara a nghet tur chuan sum lama harsatna vangin sorkarin a duh ang tâwk doctor a la thei lo tih a sawi a, "Hengte hian harsatna min thlen a, khawi district-ah pawh an mamawh leh phu ang sorkarin doctor kan dahsak thei lo a ni," a ti a; doctor lak belh turin sorkarin theihtawpa hma a lak thu a sawi.

Health Minister chuan, nurse graduate-te chu damlo an enkawlnaah Pathian ringtu nurse ni âwm rênga damlote enkawlna ṭha pe a, mi dang tana malsawmna ni tur leh, an hna tiṭhuanawp thei thil dang laka inthiarfihlîm turin chah a; damdawi lamah inenkawlna thar ṭha leh natna thar hmuh chhuah reng a nih avangin inchhiar peiha inzir zel tur leh ruih theih thil leh zûk leh hmuama fihlim turin a fuih bawk.

Lunglei Nursing School principal T Rozami sawi danin, Lunglei Nursing School hi December 1995-a din a ni a, tun dinhmunah Mizoram sorkara General Nursing & Midwifery (GNM) zirna awm chhun niin, GNM batch 19 an chhuak tawh a, graduate tharte tiamin mi 341-in an zir chhuak tawh a ni.

Graduation Day vawi 19-naah hian GNM zir zo mi 17 thlah an ni a, Health Minister-in Mizoram Nursing Council-in exam a buatsaiha topper-te hnenah chawimawina thilpek a hlân.