Naya Rivera ruang an hmu ta

Glee star Naya Rivera chu Nilaini liam ta aṭanga chin hriat loha a bo hnuah Thawhṭanni khan a ruang an hmu. Naya Ri­vera hi Ni­laini liam ta khan Los Angeles hmartlang lama awm Lake Piru-ah a bo tih Ventura County Sheriff office chuan a tarlang a ni.

A fapa kum li mi Josey nen lawng hawhin dilah hian an kal a, lawng an hawh chhuah aṭanga darkar thum hnuah hian lawng danga chuangte chuan lawngah chuan a fapa a mah chauha a awm chu an hmu a ni. A fapa chuan a nu zawngtute hnenah chuan a nu nen chuan tui an cheng tih leh a nu chu lawngah chuan a kir ve tawh loh thu a hrilh. Hemi hnu hian Rivera zawn hna hi an thawk nghal a, ni nga hnuah an hmu ta a ni. Ventura County Sheriff Department chuan an ruang hmuh chu Naya Rivera ruang ngei a ni tih Thawhṭanni khan an puang chiang nghal bawk.

Thawhṭannia thuchhuah an siamah chuan, "Tukin zingah khan Lake Piru-ah ruang hmuh a ni a, ruang lakchhuah hna thawh me a ni. Dar 2-ah press conference koh a ni ang," tiin an tarlang a, press conference-ah hian Rivera ruang ngei a ni tih hi an puang chiang ta a ni. Ventura County sheriff chuan Rivera-te nufa hi tui current chak takah an tang a nih a rin thu leh, tun ang hun velah chuan thil thleng fo a nih thu a sawi a' Rivera chuan a fapa chu chhan hman mah se amah erawh a inchhan hman ta lo nia a rin thu a sawi bawk.

Naya Marie Rivera hi Glee-a Santana Lopez role a chan aṭangin khawvelin a hre ṭan a, film tlem azawng a chang hman a, chung zingah chuan kum 2014-a tlangzarh 'At the Devil's Door' pawh kha a tel. TV series-ah erawh a naupan lai aṭanga nikum thleng khan eng emaw zatah a inlan hman thung. Kum 33 mi chauh niin July 8-a thi angin puan a ni ta a ni.