Lunglei College-a harsatna chingfel turin MZU VC ngen

Lunglei College-in harsatna a tawh chungchangah MLA hlui Joseph Lalhimpuia chuan Mizoram University (MZU) Vice Chancellor hnenah lehkha a thawn a; College-in Covid-19 vanga harsatna a tawhte chinfel a nih theih nan inrawlh thuai turin a ngen.

Joseph Lalhimpuia chuan, Lunglei College chu community quarantine centre atan hman a nih hnuah Covid-19 vei mi 45-te dah nan hman zui niin, containment zone-ah puan a ni tih a tarlang.

MZU-in July 20, 2020 aṭangin university exam buatsaih a tum thu sawiin, exam ṭan hmain chinfel ngai tam tak a awm avangin college hnathawkte an buai hle tih a tarlang a, "Hetiang a nih lai hian Covid-19 veite enkawl nana hman a nih si avangin MZU exam hun turah exam buatsaih theih a nih loh mai a hlauhthawnawm. College thuneitute'n sorkar hnenah an harsatna thlen tawh mah se, tun thlengin hmalakna a la awm lo a ni," a ti.

Joseph Lalhimpuia hian MZU exam tluang taka neih a nih theihna turin Lunglei College chu buatsaih a nih theih nan hma la turin MZU Vice Chancellor a ngen a; a ngenna lehkha copy chu Higher & Technical Education Minister, MZU Controller of Examination, Lunglei DC leh Lunglei College Principal-te hnenah a pe bawk.