Sorkar leh HPC(D) inbe dawn

Mizoram sorkar palaite leh Hmar People Convention (Democratic) aiawhte chu vawiin hian inremna zawngin State Guest House, Aizawlah an inbe leh dawn.

Thu dawn danin, inbiakna atan hian ngawrh taka inbuatsaih a ni a, a kaihhnawih department hrang hrangte'n inbiakna hmasa lama sawiho tawhte chu a tihpuitlin dan tur an buaipui a ni.

Inbiakna hi official level-ah a ni dawn a; ṭum dang ang bawkin Mizoram sorkar aiawhte chu Home department additional secretary Lalbiakzama'n a ho leh dawn a, HPC(D) lam chu Council working chairman Lalthanglien Hmar (LT Hmar)-in a ho ang.

HPC(D) aiawh turte hian nimin khan Aizawl an rawn thleng a; inbiaknaah hian LT Hmar bakah, Dr John Pulamte, David Buhril, Lalthlamuana, Lalṭhalien leh Muanpuia-te tel tura beisei an ni.

Inbiakna hian hmasawn thui hle tawh mah se, tun ṭumah hian a hmáwr bâwk a la har deuh dawn nia thu dawn a ni. An thil sawiho tur zingah remna thuthlung siam huna HPC(D) hel, nunphung pangngaia lette khawsak phung pangngaia an khawsak theihna tura ṭanpuina pek dan tur a tel rin a ni.

Mizoram sorkar leh HPC(D)-te hi an inbiak hnuhnung ber chu December 16, 2016 kha a ni a, inremna tura ruahmanna an duan point pasarih awmna Frame Work Agreeement pawm a ni tawh.

Mizoram sorkar phût angin HPC(D)-te chuan police pakhatin silai pahnih tlanbopuia HPC(D) a zawmpui leh Zokhawthiang dáia MLA-te an lambun ṭuma police silai an chhuhsak parukte chu Mizoram sorkarah an pe kîr tawh bawk.

Hetih lai hian, Mizoram sorkar hotute chuan, HPC(D) lamin auto­nomous district council an phût a nih chuan, tihhlawhtlin theih a nih dawn loh thu lo sawi tawh a; HPC(D) aiawhte pawhin Mizoram sorkarin a tih theih loh tur chu phût luih tlat an tum loh thu an lo sawi tawh a ni.