Naupang venhimna beihpui thlak

Aizawl District Child Protection Unit (DCPU), Care World Vision India, SCERT leh Mizoram Primary School Teachers Association (PSTA)-te chuan, April 26 leh 27 khan hmun hrang hrangah naupangte khuaikhem leh an laka mawi lo taka chetna laka venhim beihpui thlakna hun an hmang.

Beihpui thlakna hun hi April 26 khan Zemabawk YMA Hall, Leitan YMA Hall, Durtlang MC Hall, Ramhlun North Primary School, Aizawl DIET, Electric Veng Primary School-I leh Chhinga Veng community hall-ahte hmang a ni.

Nau­pang nu leh pate an ko khawm a; Protection of Children from Sexual Offences (POCSO) Act chungchang, hursualna lam rawngkaia chetnain naupangte taksa leh rilru a nghawng a neih dante an zirtir a ni.

Nimin khan Tlung­vel MGNREGS Hall, Thingsulthliah commu­nity hall, Sesawng Pri­mary School-I leh Tuirial community hall-ahte beihpui thlak leh a ni a; sikul 51-a zirlai nu leh pate koh khawm an ni.

Mizoram State Child Protection Society record danin, April 2015 aṭanga March 2017 thleng khan Child Welfare Committee-ah case 227 a awm a; kum tin case 100 chuang report ṭhin ang a ni. Kum 2014 aṭanga POCSO Act hman a nih aṭangin case a pung zual niin an tarlang.