Health Minister-in sorkara thawk doctor-te Mipui tana thawk an ni tih hre turin a chah

Mizoram Government Doctors' Association (MGDA) chuan nimin khan Aijal Club-ah Annual General Conference an hmang a, Health minister Lal Thanzara'n a hmanpui. Minister chuan, doctor-te chu mipui tana thawk an ni tih hre reng turin a chah.

Health Minister chuan, doctor-te chu mihring thihna leh nunna chungchanga mipuiin an belh leh rin ber an ni tih sawiin, an nihna chu mipui tan a hlu bik hle tih a hrilh a; mipui tana thawk an ni tih inhre reng tura chahin, chutah chuan lungawina a awm tih a sawi.

Sorkar hna thawktu hrang hrang zingah doctor-te chu an pawimawh bik a, an mawhphurhna pawh a sang bik tih sawiin, Thanzara chuan, an pawimawh bikna chu chapopui lo turin a fuih a, "Mahni inthununa inven reng a ngai a ni," a ti.

Mizorama damdawi-in hrang hrangah hmanrua a la awm ṭha tawk lo tih sawiin, " Hei vang hian hna thawk thei loa inngaih tur a ni lo a, kháwl zawng zawng aiin nangmahni in pawimawh ber zawk," a ti.

Lal Thanzara chuan, doctor-te chu zûk leh hmuama fimhlim tur leh ei leh ina fimkhur kawngah mipui zirtirtu ni tura chahin, "Zûk leh hmuama fihlim hmasa tur in ni a, a taka mipui zirtir ngam lo khawpa fihlim lo in awm loh ka beisei," a ti a; doctor-te chu zûk leh hmuam ṭhat lohzia hre chiang bertu an nih avangin mipui zirtirtu atan an ṭhat ber thu a sawi.

Health Minister chuan, sorkarin doctor tam zawk lak duh mah se, sum lama harsatna vangin a duh ang a lak theih loh thu sawiin, sorkara doctor awm sate chu ṭha­hnemngai lehzuala thawk turin a ngen a; Health department a enkawlnaah doctor-te'n ṭha taka an thawhpuia an ṭawiawm avangin lawmthu a sawi bawk.

MGDA conference hi vice pre­sident Dr Chawngthanchhunga'n a kaihruai a; an member, supera­nua­tion pension-a châwl ta mi parukte thlahna hun leh an member thi mi pahnih sûnna hun an hmang.

Chawhnu lamah an president Dr C Lalhrekima kaihhruaiin rorel inkhawm an nei a; an thurel zingah 'Pension turte service hi eng vang maha pawhsei tawh loh ni rawh se,' tih leh, 'National Health Mission (NHM) Mission Director tur hi Mizoram health service mi ngei dah ni rawh se,' tihte a tel.

MJA kaihhruaiin kum 2017-19 chhunga MGDA hruaitu turte an thlang a; president-ah Dr C Lalhrekima, vice president-ah Dr Chawngthanchhunga, general secretary-ah Dr C Lalchhandama, assistant secretary-ah Dr T Lal­zawm­liana leh treasurer-ah Dr Lalthanpuii te an thlang a ni.