KHAWTHLIR

Motivational lecture
Presbyterian English School, Serchhip chuan nimin khan an sikulah ‘Motivational Lecture’ hun an buatsaih. He hun hi Serchhip PES principal Laldinpuia'n a kaihruai a, resource person K Sapdanga, Vanglaini editor-in zirlaite fuihna thu a sawi.

Lawm dawn
MJA general headquarters chuan, vawiin chhun dar 12 hian Aizawl Press Club-ah MJA Public Library-in tun hnaia lawmman a dawngte lawmna hun an hmang dawn a, MJA member-te tel vek turin an sáwm. MJA Library hian tun hnaiah Aizawl district-a rural library ṭha lawmman leh kum 2013-15 chhunga lehkhabu dawng tam lawmman an dawng a ni.

Lak luh khap
Lawngtlai DC chuan thupek chhuahin, an district chhungah ran natna hri, PRRS leh swine fever a lêng leh ṭan nia hriat a nih thu a tarlang a, "Heng natna laka ran vulhte an him nan Lawngtlai district chhungah Myanmar leh Bangladesh aṭanga vawk lak luh khap a ni," a ti. Thupek hian thla hnih chhung a huam ang.

Chhuak thei lo
Tawrh Bawm chanchinbu chu a chhutna khâwl a chhiat avangin tunlai hian a chhuak thei lo a, Tawrh Bawm chhiartute hriatthiamna an ngen.