CADC-a EM 4 leh MDC dang 3 an báng

Chakma Autonomous District Council (CADC)-a Congress party kaihhruai sorkara executive member palite leh dinhmun pawimawh dang chelhtu dang mi pathumte chuan April 26, 2017 khan an nihna aṭanga bànna, chief executive member (CEM) Kalikumar Tongchongya hnenah an thehlut.

Thu dawn danin, bànna thehluttute hi EM palite chu - Taxation changtu Amit Kumar Chakma, Primary School Education changtu Amar Smriti, Road Transport changtu Chitra Kumar Chakma leh Environment & Forests changtu Susen Chakma te an ni.

EM palite hi MDC pathum dangin thlawpin, bànna an thehlut ve bawk a; chungte chu - Town Planning chairman Mohan Chakma, Primary School Education Board president Susil Kumar Chakma leh deputy chief whip-te an ni. Bànna thehluttute hian Congress party an chhuahsan chuang lo niin an sawi.

Zawhna chhangin CADC CEM Kalikumar Tongchongya chuan, EM palite leh MDC dang pathumin bànna an thehluh chhan chu - Lai Autonomous District Council-a tun hnaia thil thleng ang deuhin, CADC sorkar hruaitu thlak an duh vang niin a sawi.

Thu dawn danin, MDC pasarihte hian legislature party thar an la din lo a, an hruaitu tur pawh an la thlang lo a; chutih rualin, an hruaitu atan Amit Kumar Chakma an hual nia sawi a ni.

Bànna thehluttute hian Aizawlah sorkar mi pawimawhte an dawr mek a, Congress party president Lal Thanhawla pawh hmuh an tum a ni.

CADC-ah hian EM paliin bànna an thehluh hnuah CEM telin EM pali an la awm a, Executive Secretary chu MADC Member Secretary a nih bawk avangin rorel kawngah leh hna thawh kawngah harsatna an nei chuang lo niin CEM chuan a sawi a; a kaihhruai sorkarin thlawptu a la ngah tâwk niin a sawi bawk.

CADC-ah hian elected member 20 leh nominated member pali, an vaiin member 24 an awm a; elected member 20 zinga 17 chu Congress MDC niin, independent MDC pakhatin a thlâwp. A bak MDC pahnih chu BJP leh MNF an ni.