Police kutah Bru hel pahnih an inpe

Lawngtlai district-a Vasei Police Station-ah nimin khan Bru hel pawl, Bru Democratic Front of Mizoram (BDFM) mi pahnih an inpe. Mi pahnihte hian ralthuam ken an nei lo.

Lawngtlai SP Lalsanglura sawi danin, BDFM mi sorkara inpete hi Nghalimlui khaw mi ve ve, Phedela s/o Phonoraia leh Phulorai s/o Changriha te an ni a; vawiinah Vasei PS aṭangin Lawngtlai District Court-ah hruai tum a ni.

BDFM helte hi Mizorama ralthuam nei pawl zinga mi, mi dangte rîkrâp a, pawisa khawn ṭhin an ni a, Bangladesh-a an tawmbona hmun tlawhchhana vak kual vel ṭhin an ni. An zingah tun hnaiah buaina leh inthahna a chhuah avangin an keh darh a, an zinga mi panga chu tun hnai khan an ralthuam nen Mizoram police-in an lo man tawh bawk.

Police kuta inpe ta BDFM mi pahnihte hi police-in an zawn lai an ni a, hmun hrang hrangah an tlanchhe ṭhin. An sahim zawkna atana inpe mai tura police-in an ngen hnuah, police-ah an inpe ta niin Lawngtlai police hotute chuan an sawi.