Dr Beichhua'n Tribal Affairs Minister a kâwm

Social Welfare minister Dr K Beichhua chuan nimin khan New Delhi-ah Union minister of state for Tribal Affairs Renuka Singh Saruta chu a kâwm a; Mizorama Eklayva Model Residential School (EMRS) chungchanga hmalaknate a sawipui.

Dr K Beichhua chuan, Mizoram chu tribal area a nih angin RD block 26 huam chhungah EMRS hawn vek tuma hmalakna kalpui mek a nih thu sawiin, "RD block zawng zawngah EMRS hawn vek a nih chuan zirna kawngah Mizoramin nasa takin hma a sawn thei dawn a ni," a ti.

Renuka Singh Saruta chuan, EMRS chung­changa Dr Beichhua sawi chu hmalakpui a tum thu a sawi a; Noaotla, Siaha district leh Tlungvela EMRS sakna atan cheng vbc. 14 pek chhuah nghal a nih tur thu a hrilh.

EMRS pakhat dinna atan hian sorkar laipui chuan cheng vbc. 24 zel a ruahman a, CBSE course kalpui niin, sikul pakhatah zirlai 400 chuang zel awm theihna tura ruahman a ni.

Tun dinhmunah Mizo­ramah EMRS pahnih - Lunglei Pukpui leh Serchhipa Kawlritlangah kalpui mek a ni a; Ngopaah EMRS building sak zawh tawh a ni. Mizoram chhunga RD block pa­thum­ah building sak mek a ni a, block pangaah sak ṭan tura kut­thlak a ni tawh bawk.