Lawngtlaiah Horticulture Exhibition hmasa ber

Lawngtlaia Horticulture department leh Lawngtlai Florist Association (LFA)-te chuan, nimin khan Lawngtlai Council Venga LADC Conference Hall-ah Lawngtlai Horticulture Exhibition 2017 an buatsaih ṭan a, Horticulture minister PC Lalthanliana’n a hawng.

Horticulture Minister chuan, Lawngtlaiah a vawi khatna atana Horticulture Exhibition buatsaih a ni chu lawmawm a tih thu sawiin, hmasawnna tura bul ṭanna pawimawh a nih thu a sawi a; Horticulture chu hmasawnna kawnga ke pên tura hmanraw pawimawh a nih thu sawiin, "Tui ve satliah leh ti mai mai ni lo a, tih tak taka beite tan hlawhtlinpui theih ngei tur a ni a, sorkar pawhin ṭanpui ngai ni lo, ṭanpui tlak tak takte chauh puih a tum a ni," a ti.

Horticulture director Dr Elizabeth Saipari pawhin thu sawiin, "Exhibition-a pangpar pho chhuahte hi a chi kimin, hmun dang nena khaikhin pawha sitawm bik lo a ni," a ti a; pangpar khawi chu ei zawnna tlak a nih avangin Lawngtlai district-ah uar zel ni se a duh thu a sawi.

Lawngtlaia Horticulture Exhibition-ah hian item chi hrang 29 pho chhuah a ni a, a mal chhiarin 361 a ni. Exhibition hian April 29, 2017 chawhnu dar 1 thleng a awh ang.