Sorkar PP leh advocate-te intuaihriamna buatsaih

Nimin khan Aijal Club-ah Mizoram sorkar hnuaia public prosecutor (PP) leh advocate-te intuaihriamna leh thil pawimawhte inzirtirna hun buatsaih a ni a, Law & Judicial minis­ter Lalsawta'n a hman­pui. Training of Public Pro­secutors & Government Advocates hi vawiinah chhunzawm a ni ang.

Law & Judicial Minister chuan, PP leh advocate-te chu an hmasawn dante leh chak zawka hna an thawh theihna tura an mamawh leh harsatnate a zawt a; training chu Court-ah sorkar dinhmun a ṭhat theih nana buatsaih a ni tih sawiin, "PP leh advocate-te'n an training aṭanga hlâwkna an neih a, an case khawihah lan chhuahtir an tum a ngai," a ti.

Lalsawta chuan, zawi zawiin PP leh advocate-te'n hma an sawn thu a sawi rualin, "Hmasawn lehzualna tur erawh tam tak a la awm," a ti a; PP leh advocate-te dinhmun a ṭhat zawk nan Law & Judicial department aṭanga para-wise comment petute pawh an ṭan lehzual a ngaih thu a sawi.

Training hawnna inkhawm hi Law & Judi­cial secretary Marli Van­kung leh joint secretary Zahmingthanga Ralte ten an kaihruai. Training chhung hian The Mizo Marriage, Divorce and Inheritance of Property Act 2014, Important Provisions of Prevention of Corruption Act 1988, Drugs and Cosmetics Act 1940, Mizoram Lokayukta Act 2014, National Investigation Agency Act 2008, Arms Act 1959, Explosive Substance Act 1908, Mizoram Civil Courts Act 2005, Registration Act, hmeichhia leh naupang humhimna dan leh dan dang pawimawhte an zirho a ni.