KHAWTHLIR

State Referral Hospital (ZMC)-ah nimin khan Covid-19 vei rinhlelh thilah mi pali dah luh thar an ni a, an swab sample lâk tawh niin, vawiinah endik a ni ang. SRH-ah hian Covid-19 vei mi 25 an awm mek a, an vaiin Isolation Ward-ah enkawl niin, harsatna nei an awm lo tih, nimina SRH-ZMC Bulletin chuan a tarlang. Hripui vei ni lo damlo dang 10 an awm bawk.

Congress Legislature Party (CLP) leader Zo-dintluanga Ralte chuan nimin khan Covid-19 vei leh vei loh endikna turin Reverse Transcriptase Polymerase Chain Reaction (RT-PCR) a chah thleng. Zodintluanga hian RT-PCR hi Lunglei Civil Hospital-a dah tur­in vawiin hian Lungleia thuneitute hnenah a hlàn dawn nia thu dawn a ni.

K Zothansanga s/o K Lallawmzuala, Armed Veng leh Ngokhingia d/o Phunzamlova, Tipa-te chu Covid-19 do leh a veite enkawlnaa a ṭul ang ang thawk turin an inpe a, Health department hotute hnenah an inhriattir. An pahnih hian health worker zir chhuak ve ve an ni.

Social Welfare minister Dr K Beichhua chuan nimin khan Saikao (Serkawr) khuaa Lakher Pioneer Mission hmunpui leh sap missionary-te sûlhnu humhalhna atana Ministry of Tribal Affairs-in phalna a rawn pek tawh 'Preservation of Heritage Land at Serkawr'  project tur a hmunah a tlawh a, hna thawh dan tur a enfiah.

Aizawl DC chuan nimin khan hriattirna tichhuakin, fûr ruahtu a tlak tawh avangin, in hmun lài tur reng rengin local council/village council hriatpuina an la hmasa tur a nih thu a puang. Hriattirna hi Aizawl District Disaster Management Authority thu anga siam a ni a, leimin laka mipui himna tura siam a ni.

Tuirial bialtu MLA Andrew H Thangliana chuan a MLA fund 

aṭangin cheng nuai 25 chu Covid-19 donaa hman turin nimin khan Chief Minister's Relief Fund-ah a thawh.