Ruihhlo Dona Ni denchhenin Cheng nuai 928 hù ruihhlo hâl ral
Nimin kha khawvel puma Ruihhlo Dona Ní, 'International Day Againts Drug Abuse & Illicit Trafficking' a ni a, he ni denchhen hian Excise & Narcotics department (END)-in ruihhlo an man zinga court-in tihral a phalsak tawh cheng nuai 928 hû chu nimin khan MJA president Zonunsanga Khiangte-in a hâl ral.
Aizawl Zoological Park (Sahuan), Lungverha bawlhhlawh hâl ralna (incinerator)-a ruihhlo hâlna inkhawmah Zonunsanga Khiangte chuan, END leh thuthar thehdarhtute chu tunhma aṭang tawhin inhne hnai tak an nih thu a sawi a, "A chhe lama tarlan tam loh department leh fak mawi chawp ngai lo an ni," a ti.
MJA President chuan, END-in ruihhlo tam tham tak an man ṭhin chuan mite nunna a pawhsei bakah a chhanhim ṭhin tih sawiin, "END hna hi sorkar hna mai ni loin, Pathian rawngbawlna a ni," a ti a; dik leh huaisen taka ram leh hnam tan thawk zel turin END-a thawkte duhsakna a hlân.
END commissioner Ngurchungnunga Sailo chuan, India sorkarin ruihhlo mante hâl ral dan tur a siam tih sawiin, END-in ruihhlo an mante pawh kawl reng theih a nih loh thu a sawi a, "Dan anga court-a dil thlap hnuah END hnuaia Drugs Disposal Committtee-in court-a case chinfel tawh, tihral theih a tih chinte hâl ral ṭhin a ni. Ruihhlo man turin staff-te an thawkrim em em a, an fakawm hle a ni," a ti.
Nimina ruihhlo hâl ralte hi END-in nikuma International Day Againts Drug Abuse & Illicit Trafficking-a ruihhlo eng emaw zat hâl hnua an man lehte a ni a; a vaiin Rs. 9,28,70,805 man a ni.