Lirnghingin nghawng a neihte thlirho

Chief minister Zo­ramthanga hoin nimin khan tun hnaia Mizorama lirnghingin khawchhak lam khaw hrang hrang a nghawng dan leh lir­nghing na zawk a thlena in­­puahchah dan tur sawiho a ni.

CM Zoramthanga chuan, tun hnaiah hun rei lo te chhungin ṭum eng emaw zat Mizoram khawchhak lam khuate lirnghingin a sâwi avang­in lungmuanga awm thei lo leh mahni inah pawh mu ngam lo an awm chu hrehawm a tihpui thu a sawi a, "Chutih rual chuan, nunna chán an awm loh avang leh hriselna leh supply kaihhnawih chhiatna a thleng lo hi a lawmawm hle a ni," a ti.

Bialtu MLA, Geology & Mineral Resources (GMR) leh Mizoram University aṭanga mithiamte'n rang taka a hmunah thil awm dan ngaihvena an kal nghal chu lawmawm a tih thu sawiin Zoramthanga chuan, lirnghingin a nghawng khaw mipuite'n tun maia an mamawh nghal tur thilte ngaihtuahsak nghal turin Disaster Management & Rehabilitation (DMR) department hotute a hrilh a ni.

Ṭhutkhawmah hian, lirnghingin chenna in, ­biak-in, hall leh thil dang­te a tihchhiat dan thlirho a ni a; DMR leh MIRSAC aṭang­in mithiamte'n Mizorama lirnghing thlen theih dan leh nghawng a neih theih dante a lem nen an sawifiah.

Meeting-ah hian Health minister Dr R Lalthangliana, DMR mi­nister Lalchamliana, FCSCA minister K Lalrin­liana leh East Tuipui bialtu MLA Ramthanmawia te pawh an tel a ni.