Petrol free sale-a lâk theihna a váng ; Black-a petrol zuarte an inhralh thei

Tun hnaia ruahsur nasa avanga Meghalaya leh Assam state-a leimin, tuilian leh rél kawng chhia avangin Mizoram­ah tuialhthei (petrol/diesel) phurh luhna kawngah harsatna a la awm zel a, hei vang hian Aizawl khawpuiah a duh apiangin tuialhthei an lak theihna pump/filling station a tlem hle. Hetihlai hian, dan loa petrol zuarte an inhralh thei hle thung.

Vanglaini palaiin Aizawl khawpui hmun hrang hranga petrol pump leh dan loa petrol zawrhnate a fan kualnaah, petrol mamawha zawng kual an tam hle. A duh apiangin petrol an lak (free sale) theihna tlem azawng a awm a, dan lo (black)-a zuar eng emaw zat hmuh tur an awm.

Aizawla pump-ah petrol litre khat Rs 95.49 man a ni mek a, free sale lohna pump-a la turin coupon emaw, supply permit emaw neih a ngai. Black-a zawrhnaahte chuan petrol man chu a man pangngai lêt hnihte a ni hlawm a, litre khat Rs 150 - 200 a ni tlangpui. Hetih rual hian, petrol mamawh an tam avangin an hralh zo hma ṭhin hle.

Dan loa petrol zuara litre khat Rs 200-a hralhtute chuan, petrol an zawrh to chhan chu an lâkna hmun a hlat vang a nih thu Vanglaini palai an hrilh a, "A hlâwma litre 20 chuang rawn leite an awm a, ni khata kan lâkte hi a ni vêkin a zo nghal fo. Inchan lo pawh an awm ṭhin," an ti.

Black-a petrol zuar zingah Aizawl khawpuia petrol pump aṭanga bûra la an awm rualin, a man toa zuarte chuan Aizawl khawpui páwn bakah, district dang aṭangin an la ṭhin tih an sawi bawk.

Tarlan tawh angin, tunlai hian state dang nena inkalphawhna a ṭhat loh avangin tuialhthei a váng hle a; free sale-a hralhna pump-ah chuan thui tak tak an intlar ṭhin. Dan loa petrol zuartute chu man theih leh hrem theih an nih rualin, mi tam tak chuan an ṭangkaipui hle a ni.

Hetih lai hian, kumin May thla khan Food, Civil Supplies & Consumer Affairs (FCSCA) department hotute chuan, Aizawla dan loa tuialhthei zuarte'n thupek an zawm ṭhat tlangpui thu te, dan loa gas leh oil zawrhnate an fan kual ṭhin thute an sawi a; "Aizawlah petrol black-a zuarte kan vâi a, kan hmuhte chu ti tawh lo turin warning kan pe," tiin, warning pek hnuah dan loa petrol zuar mi pakhat chiah an man thu Vanglaini an hrilh a ni.