Aizawlah ruihhlo dona ni hman a ni ; Ruihhlo do beihpui thlak a ngai - CM

Sorkar department-te leh pawl hrang hrang huaihawtin nimin khan Assembly Annexe conference hall-ah International Day Against Drug Abuse & Illicit Trafficking (June 26) hman a ni a, chief minister Zoramthanga khuallian a ni. CM chuan, ruihhlo do beihpui puan a ngaih thu leh ruihhlo donaah mipuiin theihtawp an chhuah a ṭul thu a sawi.

Chief Minister chuan, ruihhlo do beihpui thlak a ngaih thu sawiin, "Khàn hrang hrang aṭangin theihtawp chhuaha beih a ṭul. Hmalakna awm tawhte a fakawm a, chutih lai chuan nasa taka beihpui thlak a ṭul. Ti chhin leh ti ṭan an awm loh nan naupang tamna zirlaiteah inzirtirna beihpui ngawrh taka kalpui a ngai. Vantlang mipui ang pawhin theihtawp kan chhuah a ṭul," a ti.

Rei lo têah zirtirna ṭha nen faina chungchangah nasa takin hmasawn a nih thu sawiin Zoram­thanga chuan, "Ruihhlo donaah pawh hma kan sawn thei ngei ang. Ruih theih thil ngawl vei leh a kaihhnawih harsatnate avangin Mizoram hi langsar mah se, a do kawngah leh ruih theih thilin a tihbuaite enkawlna kawnga thawh ṭhat avanga entawn tlak kan ni," a ti a, theihtawp chhuah zel a ṭul thu a sawi.

Social Rehabilitation Board vice chairman K Liantlinga pawhin thu sawiin, ruihhlo vanga harsatna tâwk leh nun tlachhe mek hmachhawn thiam turin inzir a ngaih thu a sawi a, "Mizoram hi ruihhlo tawlhna kawng pakhat a nih avangin a bâwiha táng an tam phah a ni," a ti.

Inkhawm hi Social Welfare secretary Arun Mishra-a'n a kaihruai a, Civil Hospital, Aizawla psychiatrist Dr Ruth Lamuanpuii, MSDRB aṭangin Lalrindika leh Excise & Narcotics assistant commi­ssioner Peter Zohmingthang te pawhin thu an sawi. Kawng hrang hranga ruihhlo donaa thawk ṭhate hnenah chawimawina hlan a ni a, ruihhloin a tihbuaite enkawlnaa hnárkaitu thi tawhte leh ruihhlo do hna thawh laia thite sûnna hun hman a ni bawk.