Kawngpui thawm ṭhatna atan Cheng nuai 4,000 pawm a ni
Mizoram Road Fund Board chu an chairman, chief minister Zoramthanga hoin June 28, Thawhlehni khan CMO Conference Hall-ah an ṭhukhawm a, hmalaknate an thlir lêt bakah, thu pawimawhte an rél a, kum 2022-23 chhunga kawng thawm ṭhat nan cheng nuai 4,000 an pawm.
Ṭhutkhawmah hian kum 2021-22 chhunga kawng enkawl hna thawhte thlir lêt a ni a; Board-in road maintenance fund hmanna tur a pawm tawh cheng nuai 4,000 chu hman zawh a ni tih tarlan a ni. Cheng nuai 4,000 hmannate chu - Maintenance Action Plan, normal maintenance leh bridge maintenance, PMGSY leh fûr ruahtuiin a tihchhiat kawng siamṭhatnate a ni.
The Mizoram Road Fund (Amendment) Act, 2016-in economic/social atana kawng pawimawh bik sorkarin a puan ṭhinte tia a sawi, Core-Road network chungchang te, sum hmuhna chungchangte sawiho a ni a; kum 2022-23 chhunga kawngpui thawm ṭhatna (normal/routine maintenance of roads, maintenance action plan, maintenance of PMGSY roads, maintenance of bridges, monsoon damage repair) atana sum ruahman nuai 4,000 an pawm a ni.
Mizoram Road Fund Board-ah hian chairman chu Chief Minister niin, Chief Secretary chu vice chairman a ni a, PWD Secretary chu member secretary a ni. AMC, LADC, MADC, CADC, ZDU, MTOA, MRTU leh tlawmngai pawl ṭhenkhat aiawh an tel.