KHAWTHLIR
Thisen pe
Lawngtlaia Region Higher Secondary School NSS unit chuan nimin khan an sikul auditorium-ah thisen pek rûnpui an huaihawt a, Lawngtlai District Hospital tan thisen unit 71 an pe a, petute mipa 61 leh hmeichhia 10 an ni.
Synod-in ṭanpui
Mizoram Synod chuan Silchar tuilian tuarte chhawmdawlna atan nimin khan Rs 8,00,000 an hlân. Ṭanpuina sum hi Synod moderator Rev.Dr Vanlalnghaka Ralte-in Cachar DC hnenah a hlân a ni.
Kuhva rah man
Champhai police-te chuan June 28, Ningani zan khan Champhai Tlangsam huam chhungah lirthei an endik a, Jesy Ramthianghlima, Tlangsam truck khalh aṭangin kuhva rah ip 70 an man. Kuhva rah hi cheng nuai 5.25 man a ni.
MLA-in hmanpui
MZP Headquarters, Biate chuan nimin khan an khuaa zirlai ti ṭhate chawimawina hun an buatsaih a, MLA Zodintluanga Ralte-in a hmanpui. Zodintluanga chuan, Biate khawtlang inrêlbàwlna ṭha a tih thu sawiin, "Khawtlang inrêlbàwlna fel tak avangin khaw zahawm tak siam a ni ṭhin. Inrêlbawl danah entawntlak in ni a, khaw fai ber in ni reng hi in fakawm tak zet a ni," a ti.
Minister-in enfiah
Minister of state K Lalrinliana chuan nimin khan Champhai leh a chhehvela a enkawl department pathum hmunhma leh hmalaknate a enfiah. Champhaia FCSCA officer tarlan danin, Champhai district-ah fûr ruahtui tlak chhunga rin tur thla thum leh a chanve daih buhfai chhêk khâwl a ni.
Heroin man
Champhai police-te leh 8th Assam Rifles sipaite chuan June 28, Thawhlehni khan Zokhawtharah heroin gram 226 an man a, a neitua puh mipa pakhat an man tel bawk. Heroin an man hi Rs 1,33,00,000 hû a ni.